The Drama Factory in Strand pronk met ’n propvol vermaakprogram wat plaaslike gehore ’n heerlike verskeidenheid komedie, musiek en teatergenot vir die jongeres bied.
“Of jy geraak word deur ritme en blues, nostalgiese wysies of reggae en rockballades – ons het net die musiek vir jou!” sê Sue Diepeveen, die stigter van The Drama Factory. “Ons verwelkom ook Every Brilliant Thing met ’n nuwe kunstenaar, Henu Baden, wat mees onlangs op ons verhoog in The Emperor’s New Clothes te sien was.
“Niks kan vergelyk met die ervaring van ’n verhoogvertoning deur die verstommende Suid-Afrikaanse talent wat ons hier op ons voorstoep het nie. Kyk ook uit vir ons eerste inklusiewe kunstefees wat deur Storywood Inclusive Arts hier en by The Playhouse Theatre in Somerset-Wes aangebied word,” sê Diepeveen.
“Die Fees vind van Woensdag 13 tot 20 Maart plaas en bied ’n aantal teaterproduksies en kunswerksessies aan vir gehore met komplekse behoeftes en hul versorgers. Die doel van die fees is om ’n veilige ruimte vir sulke gehore te skep, ongeag hul spesifieke behoefte en om hulle in staat te stel om deel te neem aan kunservarings waarvan hulle dikwels uitgesluit word.”
Besprekings vir alle vertonings kan gedoen word by www.thedramafactory.co.za; of kontak 073 215 2290.
Met sy volledig gelisensieerde kroeg en gesellige, verwelkomende atmosfeer, is The Drama Factory die perfekte venue om topvermaak saam met ’n groep vriende of familie te geniet. Die sonkrag-aangedrewe omsetter verseker dat die vertoning altyd sal voortgaan, selfs wanneer beurtkrag duur.
The Drama Factory is by Comprop Square 10, Henry Vos-slot, Asla-sakepark. Parkeerplek is beskikbaar by die venue.
Jeff Brooker Productions bring Macmillan se gevierde toneelstuk Every Brilliant Thing na die Drama Factory-verhoog. ’n Jong seun maak ’n lys van elke briljante ding in die wêreld om sy ma te help om depressie en selfmoord te bestry. Dit begin met eenvoudige plesier soos roomys, waterpret en om oor slaaptyd wakker te bly om TV te kyk, en word later eienaardige items soos ou mense wat hande vashou. Namate hy volwasse word, verander die lys ook in ’n aangrypende bewys van die krag van positiwiteit in teëspoed. Die eenmanvertoning kry lewe deur die talentvolle kunstenaar Henu Baden en is geregisseer deur Jeff Brooker. Dit ontvou in ’n intieme, meeslepende “in-die-ronde”-omgewing. Gehoorlede word genooi om deel te neem aan die voordrag van items op die lys, wat ’n gedeelde en diep emosionele ervaring skep. Elke briljante ding sal jou laat lag totdat die trane oor jou wange stroom en ook laat huil totdat jy besef ’n glimlag moet jou reaksie op die lewe se uitdagings wees. Vertoningsdatums en -tye is as volg: om 20:00 Donderdag 7 en Vrydag 8 Maart; om 15:00 en 20:00 Saterdag 9 Maart; om 20:00 Donderdag 14, Vrydag 15 en Saterdag 16 Maart; en om 18:00 Sondag 17 Maart. Kaartjies is teen R185 beskikbaar.
En nou, vir iets heeltemal anders! Of nie. Ná die sukses van haar eerste solo-narvertoning, AÏo, het Sophie Joans ’n nuwe aanbod: ÜÜÜ (uitgespreek oooooo). ’n Nar en ’n trekklavier. Papiervliegtuie. Te min. Te laat. Waarvoor wag jy? In hierdie nuwe solovertoning span Joans weer saam met die regisseur Rob Van Vuuren, wat ook die regie van haar puik-solo-vertoning ÎLE behartig het en wat nasionaal en internasionaal getoer en benoemings en pryse vir beste kunstenaar sowel as beste draaiboek losgeslaan het. Die eenmanvertoning kom om 20:00 op Saterdag 23 Maart teen R180 ’n kaartjie na die plaaslike verhoog. Foto: Nardus Engelbrecht
Niks bind ’n kultuur meer as ’n goeie rugbywedstryd nie, behalwe sy musiek, en in Jou Ma Se… Platespeler is die kollig op Afrikaanse musiek teen die agtergrond van veranderende tegnologie – van “seven singles” tot streaming en alles tussenin, asook die veranderinge in ons land. Sluit aan by Kristo Zondagh, Kerry Hiles en Rob Thompson in ’n twee uur lange viering van SA se bestes by The Drama Factory om 19:30 op Dinsdag 26 Maart voordat hulle hierdie vertoning op die pad na venues landwyd neem. Foto: RCL Imagery – Richard Llewellyn
Bespreek nou al jou kaartjie vir My Story with the Blues wat vertel van die blues-kitaarspeler en -liefhebber Rob Thompson se persoonlike reis om hierdie enigmatiese beweging in musiek te ontdek. Met Latynse invloede soos Carlos Santana, delf die storie dieper met kunstenaars soos B.B. King en Little Walter, tot meer kontemporêre kunstenaars soos Dan Patlansky en oorspronklike komposisies. ’n Regstreekse trio bring hierdie herhaaldelik uitverkoopte uitvoering op Woensdag 27 Maart na die Drama Factory-verhoog. Die kunstenaar Rob Thompson, ondersteun deur die baskitaarspeler Kerry Hiles en Kristo Zondagh op tromme, bring lewe aan sy persoonlike reis met die musiek wat sy siel voed. Sy passievolle spel, afgewissel met staaltjies, het al menige gehoor bekoor, en nou maak hierdie towerkrag ’n Strandse draai. Moenie dié vertoning om 19:00, teen R200 per persoon misloop nie! nie!Foto: RCL Imagery – Richard Llewellyn
RSG-luisteraars het vasgenael voor die radio gesit en luister hoe Tobie Cronjé lewe gee aan Rudie van Rensburg se karakters in die Hans-boeke. Cronjé was ook te sien in die rolprentweergawe van Hans steek die Rubicon oor. Teatergehore kry nou die geleentheid om Cronjé in lewende lywe op die verhoog te ervaar in ’n gedramatiseerde voorlesing en verwerking van Hans gee vir Herklaas horings. Ignatius van Heerden voorsien die radiobyklanke en beloof om gehore te laat skaterlag. Die produksie is om 16:00 op Sondag 31 Maart, asook om 11:00 op Maandag 1 April, op die Drama Factory-verhoog. Kaartjies kos R250. Foto: Pierre Rommelaere
Sluit gerus aan by Selim Kagee vir slegs een optrede op ’n nostalgiese reis deur tyd saam met Il Mondo, wat om 16:00 op Sondag 24 Maart na die verhoog kom. Ervaar klassieke wysies uitgevoer deur Kagee se fluweelagtige stem en boeiende verhoogteenwoordigheid. Verlustig jou in staaltjies uit sy lewe en wêreldreise, terwyl hy jou met geliefde klassieke musiek soos “Il Mondo” en “Bridge Over Troubled Water” verlei. Classic Feel Magazine beskou Kagee as ’n trots Suid-Afrikaanse talent, vergelykbaar met Bocelli, Groban, Pavarotti en Bublé. Kaartjies kos R180/R160. Foto: Andrew Swarts Photography
