Marshin’ Hendrix vang die verganklikheid van liefde vas, soos sand wat deur ‘n uurglas loop, terwyl sy haar eie identiteit in haar nuwe musiekvideo vier.
Dié kunstenaar van Strand het haar jongste video verlede Dinsdag (17 Junie), saam met die Gqeberha-sanger Kattie vrygestel – ‘n duet getiteld “Tyd sal bewys”.
In dié kundig geredigeerde video wissel Hendrix verse uit met Kattie oor haar minnares en die verwoestende liefdesverhou- ding waarvan net tyd sal bepaal of sy en haar geliefde uiteindelik bymekaar sal bly.
Die musiekvideo, wat deur Farron Middleway opgeneem en deur Hendrix self geredigeer is, wys ‘n egpaar wat mekaar innig liefhet, maar deur verhoudings- uitdagings gaan. Hendrix tree op as ‘n onopgemerkte toeskouer wat elke liriek met diep emosie uitbeeld.
“Ek is ‘n groot romantikus en wanneer ek liefhet, het ek intens lief. Die liedjie is geskryf met die gedagte dat net tyd sal wys of mense bestem is om bymekaar te wees,”
Marshin’ Hendrix
Sy verduidelik dat die lied spruit uit haar ervaring in ‘n samelewing wat haar liefde nie altyd geredelik aanvaar nie. “Hierdie uitdaging het my geïnspireer om elke vorm van liefde te ondersoek.”
“Tyd sal bewys” is die volgende stap in haar diepgaande verkenning van die onderwerp. Hierdie verlange om liefde te verstaan, dryf Hendrix se musiekpassie sedert 17-jarige ouderdom. “Op skool het ek die meeste van my vrye tyd aan musiek luister gewy. Dit was my daaglikse roetine,” vertel sy.
Sy het poësie geskryf wat sy later op ritmes geplaas het – sonder om van ‘n musiekloopbaan te droom.
Die pad was uitdagend.
“Ek pas glad nie in die Barbiepop- beeld nie, maar is ‘n tomboy!”
Hendrix
Hierdie kontras tussen haar voorkoms en haar kuns skep ‘n interessante dinamika. “Dit verstom mense as ek sing omdat hulle nie my stem met my gesig kan verbind nie.”
Terwyl sy self ‘n meer androgene styl het, verkies Hendrix musiek in die tradisionele R&B-genre, soortgelyk aan haar gunsteling-sanger Jhené Aiko, wat ‘n meer konvensioneel vroulike voorkoms het.
“Musiek is vir my belangriker as enigiets anders,” vertel sy. “Ek het deur die jare talle luisteraars gewen, wat my aanvaar vir wie ek werklik is. Dit alles het gebeur omdat ek myself nooit verander het nie.”
Haar outentisiteit het tot merkwaardige sukses in die musiekbedryf gelei.
‘n Besondere hoogtepunt in haar loopbaan is die liedjie “Hy is nie ek nie” deur Kattie, waaraan sy en die rymkletser Mr. P deelgeneem het – ‘n treffer wat reeds 1,6 miljoen kyke op YouTube verwerf het.
Die welslae van hierdie kreatiewe samewerking met Kattie is die rede waarom sy hom genader het om vir die derde keer stemme saam te voeg.
“Kattie is ‘n ongelooflike kunstenaar wat maklik by die tema van liefde aanklank vind,” verduidelik Hendrix. “Hy sing met soveel emosie en sit moeite in elke versreël. Dis hoekom ek geweet het hy sou perfek pas!”
As gevolg van die twee vorige samewerking was die opnameproses van die musiek “so natuurlik soos asemhaling”.
Die uitdagings het egter gekom toe dit tyd was om die musiekvideo te vervaardig.
“Alles wat kon, het skeefgeloop,” vertel Hendrix. “My skootrekenaar het skielik gebreek en ek kon nie die video redigeer soos beplan nie.”
Dis hier waar Hendrix se vindingryke aard en die ondersteuning van haar bestuurder, Alex Cupido, ‘n deurslaggewende rol gespeel het. “Ek moes die video redigeer op my lewensmaat se
iPhone, wat ure geneem het – met ‘n paar mislukkings tussenin,” onthou sy. “Ek moes letterlik 50 giga-grepe van die foon verwyder om alles te laat werk!”
Hendrix het die video ten spyte van die struikelblokke op YouTube opgelaai, wat binne net twee dae meer as 2 700 kyke behaal het.
Sy wil nie hê tyd moet stilstaan nie en is reeds besig met haar volgende projek – ‘n Engelse album asook verskeie samewerkings met plaaslike kunstenaars soos Mr. P, Big B Forever en die gospelkunstenaar Winston Siljeur.
Met haar unieke stem en eerlike benadering tot liefde in al sy vorms, bewys Hendrix dat tyd inderdaad aan haar kant is – in haar kuns sowel as in haar groeiende teenwoordigheid in die Helderberg- musieklandskap.
• Kyk die musiekvideo vir “Tyd sal bewys” by https://www.youtube.com/watch?v=Jl_XU3k8eqg
You must be logged in to post a comment.