Plaaslike trompoppies het die Helderberg en Grabouw se vlae hoog geswaai by die 2025- Suid-Afrikaanse trompoppie-en-rasieleier-vereniging (Samca) se nasionale kampioenskap wat vroeër vandeesmaand in Oudtshoorn plaasgevind het.
Die Grabouw Senior Majorettes en Dr. G.J. Joubert Primêre Skool van Strand se trompoppies het van Vrydag 4 tot Saterdag 11 Julie in die volstruishoofstad teen elite- hoërskool- en laerskoolspanne van die land heen deelgeneem.
Die taai kompetisie het uitstekende roetines en presiese koördinasie geverg, en toe die laaste vlae geswaai en kolstokke gedraai is, het die Joubies die derde plek in die laerskool-kategorie verwerf.
“Dit voel wonderlik dat die span se harde werk deur die jaar ‘n derde plek in die elite-laerskoolspan-afdeling opgelewer het,”
sê Leandra Worship, ‘n onderwyser en trompoppie-afrigter by Dr. G.J. Joubert Primêr.
Joubies het die derde plek behaal deur bestendige prestasies in alle kompetisieafdelings – veral met uitstekende uitslae in llein dril-afdeling, waar hulle die derde plek vir beide span- en vertoningsgebeurtenisse behaal het.
INDIVIDUELE VLAK
Mikay Saffier het ook op individuele vlak uitgeblink deur die klein dril-leier-afdeling te wen.
“Ek is die trotsste op ons groot dril-vertoning – die meisies het regtig hul beste gegee,” sê Worship.
Die trompoppies van Strand het die derde plek in die groot dril-afdeling vir hul span-prestasie en vertoning behaal.
As die nuutgekroonde 2025-kampioene van kampioene van Boland het die span baie gehad om by die nasionale kampioenskap te bewys, maar die druk het die jong Joubies nie van hul marsritme gegooi nie.
“Ons moes ons A-spel bring omdat dit nie genoeg is om net in jou streek die beste te wees nie. Jy moet ook by die nasionale kampioenskap presteer,” vertel Worship.
Sy het verduidelik die meisies het – toe die druk te groot geword het – op hul oefening teruggeval om hulself te kalmeer.
Die ander Boland-span, Grabouw Senior Majorettes, het Suid-Afrika se appel-hoofstad op hul rûe gesit toe hulle tiende in die hoërskool-elite-span-afdeling was.
“Hoewel die kompetisie taai was, het die span alles gegee en die meisies was uitstekend!”
beklemtoon Robin Benjamin, die afrigter van die Grabouw Senior Majorettes.
Sy sê ten spyte daarvan dat hulle die enigste Boland-hoërskoolspan in die elite-afdeling was met bykomende druk om hul status te behou, het die meisies hul kerntalent gewys en dit na die eindronde in die kolstok-groep- en groot dril-afdeling gemaak.
DRA TOT GROEI. ONTWIKKELING BY
“Elke keer as die span op die veld opgetree het, het ek trots in die afrigtersgebied gestaan omdat hulle voortreflik was,” sê Benjamin.
Die ervaring het ook langtermynvoordele. Beide sy en Worship meen die deelname aan die eindronde in Oudtshoorn het hul atlete geweldig bevoordeel, met Benjamin wat byvoeg dat dit tot die meisies se algehele groei en ontwikkeling sal bydra.
“Die feit dat hul talent en harde werk hulle na die kampioenskap en tot in die topdrie gebring het, sal vir altyd spesiale herinneringe wees,” verduidelik Worship.
Die afrigters het die gemeenskappe van Grabouw en Strand vir hul ondersteuning in elke vorm bedank.
“Ons, as die Grabouw Senior Majorettes, is uiters dankbaar en sou dit nie sonder ons gemeenskap se ondersteuning kon regkry nie,” sê Benjamin.
Hierdie ondersteuning sal die spanne dra namate die seisoen afloop en hulle vir volgende jaar voorberei.
“Die meisies is vasbeslote om vorentoe nog harder te werk en groter opofferings te maak om hul posisie as een van die drie elite-laerskoolspanne te behou,” beklemtoon Worship.
You must be logged in to post a comment.