Suzette “Suzie” Wandrag, ’n 47-jarige braaimeester van Strand, is gereed om haar stempel in Kokkedoor: Vuur en Vlam af te druk wanneer dié kookkompetisie Donderdag 6 Februarie op kykNET begin.
Sy sal een van 20 deelnemers wees wat om die titel meeding, met 10 wat as “onthou-braaiers” bekend staan – kokke sonder formele sjef-opleiding wat tradisionele braai-tegnieke gebruik – en 10 “kinkel-braaiers” – kokke wat gekwalifiseerde sjefs is.
Wandrag, wat as ’n onthou-braaier gekies is, sê sy wil die kompetisie wen.
“Ek het vir Kokkedoor ingeskryf omdat ek weet hoe om te braai. Ek wou net seker maak ek is goed genoeg om teen ander mee te ding,” het sy gesê.
Die kompetisie sal die braaiers na pragtige bestemmings neem en hulle aan uiteenlopende uitdagings onderwerp om te sien wie die hitte kan hanteer en die titel kan wen terwyl die res voor die kole sweet. Wandrag sê sy is gereed vir die drama en druk.
Haar passie vir braai het meer as 20 jaar gelede begin toe sy self moes leer hoe om iets oor die kole gaar te kry.
“Ek hou daarvan om te braai, maar toe ek wou begin, moes ek altyd by ander mense gaan kuier om dit te doen. Dit het my gemotiveer om die vlamme self te bemeester,” sê sy.
Sy het haar braaivaardighede in Mei verlede jaar ten toon gestel toe sy die eerste plek in die Outdoor X-braaikompetisie behaal het. Sy het beesvleis voorberei en moes mans – die meeste van die deelnemers – uitoorlê.
“Dit was ’n groot oomblik vir my, veral omdat ek die eerste keer met ’n Big George-roker gewerk het en nie eens my eie toerusting gehad het nie,” onthou sy.
Wandrag bestuur ook ’n sosialemediablad, Women Fire Food, wat oorspronklik geskep is om vroue te leer braai. Later het sy besef party mans sukkel ook met braai en die blad vir almal oopgemaak. Verlede jaar het sy selfs ’n braaidag net vir vroue by die toutrekklub in die Charles Morkel-stadion gereël (“Women at home behind a braai”, DistriksPos & Helderberg Gazette, 22 Mei 2024).
“Ek wou ’n geleentheid skep waar vroue hulself kan wees – nie iemand se mamma of vrou nie,” sê sy.
Hoewel sy al uitdagings met kritiek en vooroordele ervaar het, glo sy dit het haar voorberei vir die groot verhoog van Kokkedoor. “Omdat ek aan sosiale media gewoond is, het ek my voorberei op ’n tannie wat dalk ’n beswaar gaan hê met my tatoeëermerke of ’n oom wat my onderskat omdat hy glo ’n vrou hoort in die kombuis en nie voor die kole nie,” sê sy sarkasties.
Wandrag sê sy sal haar voormoeders se krag kanaliseer om haar te help wen. “In die dae toe ons nog jagter-versamelaars was, het mans die jagwerk gedoen, maar die vroue het die kos oor die kole gemaak. Nou het ons net rolle geruil.”
Suzette hoop om die kroon Strand toe te bring en te bewys dat vroue net so gemaklik voor die kole is as enige man.
