Die Helderberg-gemeenskap se Basiese Onderwys en Opleiding vir Volwassenes (BOOV)-program, wat ’n jare lange instelling by Strand Sekondêre Skool was, is op soek na ’n nuwe, permanente plek vir onderrig.
Shakoor Vallie, die dryfkrag agter die plaaslike tak en ’n stem vir die gemeenskap, het sy ontsteltenis uitgespreek oor die skool se onlangse besluit om “sy deure vir die aandskool te sluit”. Vallie het verduidelik dat die program ses jaar gelede uit ’n behoefte wat deur onderwysers in die gemeenskap geïdentifiseer is by Strand Sekondêre Skool ontstaan het.
“Ná verskeie pogings, veral die afgelope ses weke, om ’n dispuut tussen die gemeenskap en die skoolbeheerliggaam (SBL) oor ’n beweerde wanbetaling deur die Departement van Hoër Onderwys en Opleiding op te los, het die SBL besluit om die program te staak. Die SBL kon nie die oorspronklike kontrak met die departement, wat ses jaar gelede aangegaan is, verskaf nie. Hierdie besluit het teleurstelling in die gemeenskap veroorsaak, en vrae ontstaan oor die motivering daarvan en of die gemeenskap behoorlik in ag geneem is,” het Vallie aan die koerant geskryf. “Dit is belangrik dat integriteit gehandhaaf word wanneer sulke drastiese besluite geneem word. ’n Gemeenskap kan nie sommer van ’n openbare instelling geskei word, terwyl daar terselfdertyd beweer word dat besluite in die belang van die skoolgemeenskap geneem word nie. Dit kom neer op die misbruik van mag onder die dekmantel van gemeenskapsbelang. ’n Deurdagte, kollektiewe besluitnemingsproses, wat alle rolspelers in ag neem, is ’n vereiste. Die WKOD moet ’n indringende ondersoek begin na die werklike stand van sake by ons skole en die bevoegdheid van skoolbeheerliggame om kontraktuele ooreenkomste te bestuur, evalueer.”
Volgens Vallie is die program sedert sy ontstaan ’n reusesukses en het dit met die eerste jaar ’n rekordinskrywing van 350 matrikulante besorg. Weens beperkte onderwysertoekenning kon daar egter slegs 150 studente geakkommodeer word.
Vanjaar het die program 20 matrikulante wat aandklasse bywoon, maar het meer as 50 navrae ontvang voordat verwarring weens die verandering van die onderrigplek ontstaan het. Vallie het verder verduidelik dat die sluiting van die program ’n groot leemte vir volwassenes en skoolverlaters sou laat.
Geen kontrak
Volgens ’n verteenwoordiger van die skool se SBL is ’n formele vergadering met Vallie en alle relevante belanghebbendes gehou, waar die SBL sy bekommernisse uitgespreek het. “Dit is van kardinale belang om daarop te let dat Strand Sekondêre Skool nie ’n formele kontrak met die program het nie, aangesien hul ooreenkoms in 2020 beëindig is. Sedertdien is die program op die skoolterrein bedryf sonder die nodige dokumentasie,” het die verteenwoordiger gesê.
“As ’n skoolgemeenskap is ons nie verplig om gemeenskapsorganisasies sonder behoorlike kontrakte te akkommodeer nie, aangesien hierdie reëling nie koste-effektief is nie. Ons prioriteit is om te fokus op die bou van die karakter en infrastruktuur van die skool, wat beduidende finansiële verliese gely het. Ons het voldoende kennis gegee rakende hierdie kwessies en die skool se algehele ontwikkeling.”
Die verteenwoordiger het verder gesê dat die SBL leerderwelstand en onderwys as prioriteit gestel het, en sekuriteitsrisiko’s as rede aangevoer wat voortspruit uit onbeheerde toegang gedurende die aandskool. Nog meer, het die SBL die finansiële reëling met die program as ongunstig beskou.
“Die SBL vra ook dat mnr. Vallie die besluite wat geneem is, respekteer,” het die verteenwoordiger bygevoeg.
Volgens Millicent Merton, woordvoerder vir die WKOD, het die skool ’n kontraktuele ooreenkoms gehad vir die gebruik van sy fasiliteite vir die program van 2020 tot 2022. Volgens die ooreenkoms het die skool ’n maandelikse toelaag wat toegeken is vir opsigterdienste en nutsuitgawes, ontvang.
“Die skool het egter onvoorsiene finansiële verliese gely weens skade wat tydens aandklasse opgedoen is, wat gelei het tot addisionele herstelkoste.”
Verder was die maandelikse fooi onvoldoende om nutsuitgawes te dek, en agterstallige bedrae is ook opgeloop, het Merton gesê.
“Na die verstryking van die aanvanklike kontrak het die SBL ’n hersiene ooreenkoms voorgestel, maar die aanbod van ’n verminderde maandelikse toekenning is deur die skool as onvolhoubaar beskou.”
Hoewel die program steeds ’n tuiste benodig, word aandklasse vir tyd en wyl in die Eagle-gebou aangebied. Dit, volgens Vallie, danksy die gewaardeerde ondersteuning van Attie Phillips en sy vrou “wat meer insig toon rondom die dilemma wat die gemeenskap tans ervaar”.
