Selfoon teruggekry, vermeende rower vasgetrek

’n Bobaasspeurder van die Macassar-polisie, adjudant-offisier Cobus Greeff, het ’n pluimpie ontvang vir sy spoedige reaksie wat nie net ’n roofslagoffer se selfoon terugbesorg het nie, maar ook tot die inhegtenisneming van die vermeende verdagte gelei het.

Luidens ’n polisieverslag het Greeff in speur-aksie oorgegaan nadat ’n jong vrou van die gemeenskap Maandagoggend 19 Februarie deur die vermeende rower geteiken is.

“Die jong vrou is omstreeks 07:30, terwyl sy gewag het om te begin werk, van haar selfoon beroof. Sy het na die polisiekantoor gehardloop, waar sy deur lede van die Macassar-polisie bygestaan ??is. Nadat sy ondervra is, is daar bevind die verdagte is ’n bekende misdadiger en voormalige kêrel van die slagoffer,” het die polisieverslag onthul.

Greeff het die slagoffer aan die hand geneem en ’n soektog na die verdagte van stapel gestuur.

“Navraag is by die verdagte se huis gedoen, waar inligting ontvang is dat die verdagte moontlik op pad is na Korrektiewe Dienste in Somerset-Wes. Greeff het toe beamptes ingespan wat hom bygestaan ??het om die verdagte op te spoor. Hulle het dadelik na Korrektiewe Dienste in Somerset-Wes gegaan, waar hulle gevind het die verdagte word deur lede van Korrektiewe Dienste aangehou nadat hy met sy parool begin het. Die verdagte is glo op Valentynsdag op parool vrygelaat. Hy is egter aangekeer nadat hy in besit van die gebuite selfoon gevind en deur die Macassar-polisie vasgetrek is.”