Die 25-jarige Veronique de Koeker van Macassar het in die skadu van ‘n pynlike, kroniese oogtoestand ‘n merkwaardige akademiese mylpaal bereik deur vroeër vandeesmaand met ‘n Baccalaureus in Onderwys (B.Ed.) grondslagfase-graad met ‘n indrukwekkende ses onderskeidings te gradueer.
Dié trotste oomblik vir haar ouers, Stephen en Valencia de Koeker, het op Vrydag 3 Oktober tydens die gradeplegtigheid in Johannesburg aangebreek.
“Toe sy haar graad ontvang, het my hart trots geklop en ek was emosioneel,” het haar ma gedeel. “Ek is bly dat ek my deel as ‘n ouer gedoen het en ek is baie trots.”
Veronique, wat Somerset-
Wes Metodiste Primêr bygewoon het en in 2018 aan die Mondeor Eco School gematrikuleer het (met ‘n B-simbool en vrystelling), het ‘n mediese uitdaging sedert sy vyf jaar oud is – ‘n probleem met haar kornea-struktuur.
“As haar ma kan ek sê sy het sedert vyfjarige ouderdom ‘n probleem met haar oë gehad, maar sy het steeds haar vasberadenheid en harde werk behou,” het Valencia gesê. “Dit was nooit ‘n verskoning nie. Niks kon in haar pad staan om haar doelwitte te bereik nie. Sy maak geen verskonings nie – ondanks haar uitdagings.”
Die toestand vereis voortdurende bestuur, met dokters wat haar oë gereeld ondersoek en medikasie voorskryf.
Hoewel Veronique ‘n operasie moet ondergaan, het haar ma gesê dit is slegs ‘n korttermynoplossing aangesien die toestand ongeneesbaar is.
Tog het hierdie werklikheid haar motivering net aangevuur. “Haar oogprobleem het haar nooit teruggehou nie. Sy was so gemotiveerd en inspirerend; sy het hard gewerk en elke aand studeer,” het haar ma gesê en die intense toewyding wat vereis word, beklemtoon.
Veronique, wat by haar ouers in Brandwagstraat in Macassar woon, het haar passie vir onderwys onmiddellik ná skool nagestreef.
In 2019 het sy ‘n diploma in vroeëkinderontwikkeling (VKO) aan die Centurion-kollege in Bellville voltooi.
Sy het haar VKO-NQF- vlak 5-sertifikaat in 2020 ontvang. Sy het met haar B.Ed.-graad aan die Stadio-kollege begin verwerf en uiteindelik haar Onderwys-vlak-7-grondslagfase-graad in September vanjaar verwerf.
Sy pas tans haar hardverdiende vaardighede toe as ‘n assistent-onderwyseres by die Rusthof OLSO-skool – ‘n pos wat sy sedert Januarie beklee.
Die De Koeker-gesin het hul opregte dank uitgespreek teen-oor die professionele mediese mense wat instrumenteel was in die hantering van Veronique se toestand: dr. James Beaty, dr. Colin van Wyk, dr. Meriek van den Berg en dr. Paul Keet.
Om haar ongelooflike akademiese sukses en deursettings vermoë te vier, het haar ouers ‘n puik geskenk aangebied. “Ek het vir haar haar eerste motor, ‘n Hyundai Atos, gekoop en sy het ook vanjaar haar lisensie gekry,” het haar pa met ‘n glimlag gesê.
“Ek is so, so trots – nie elke kind bereik dit nie en hopelik kan dit ‘n ander kind inspireer om hul drome na te streef, ongeag hul omstandighede.”
You must be logged in to post a comment.