’n Strand-boorling wat tans in Stellenbosch woon en werk, het nooit toegelaat dat enigiets in sy pad staan nie – en vandag het hy ’n BA-graad en ’n nagraadse sertifikaat in onderwys agter sy naam.
Hy het aan Strand Sekondêr matrikuleer.
Hy het sy sertifikaat in 2021 ontvang en dadelik ’n instaan-pos by Oklahomastraat Primêre Skool in Macassar. “Dit was een van daardie Covid-19-poste waar ek ingestaan het vir ’n onderwyser wat op die lys vir mense met onderliggende siektes was en eers weer kon begin skoolhou nadat Covid tot vlak drie gedaal het. Ek kon dus net vir daardie tydperk by die skool werk.”
Daarna het hy vir die res van 2021 by Hoërskool Kylemore gewerk, waar hy onderskeidelik Engels en toerisme onderrig het. Tans is hy ’n voltydse onderwyser by Stellenzicht Sekondêre Skool.
“Ek is deur ’n enkelouer grootgemaak. My ma het nie altyd ekstra geld gehad nie. Ek moes in graad 11 en 12 werk om ’n geldjie te maak om vir myself die klere te koop wat ek graag wou gehad het.”
Chad se toekomsplanne is om eendag sy eie vaardigheidskool vir kreatiewe leerders saam met van sy vriende te open.“Ek wil eendag ook ’n skoolhoof wees en ek my eie werkswinkel open waar ek en my familielede kan saamwerk. Ek het, toe ek nog klein was, saam my pa aan karre leer werk. Ek het eintlik nog ’n klomp drome wat ek eendag wil behaal in my kop,” sluit hy af.
