’n 61-jarige inwoner van Heldervue het onlangs weer ’n roete op die bekende Camino voltooi.
Johan van der Hoven het van Maandag 2 Mei tot Vrydag 3 Junie van Irun in Spanje tot in Santiago gestap. Dit staan bekend as die Camino del Norte. Op Maandag 6 Junie takel hy toe vir drie dae die roete van Santiago na Finisterre en op Saterdag 11 en Sondag 12 Junie loop hy al die pad tot in Muxia wat ook bekend staan as die Camino de Fisterra.
“Die Camino Fisterra en Fisterra tot Muxia is kort roetes, wat mense meestal aanvullend stap na die lang Camino’s. Ek het dit maar gedoen omdat dit so ver is om Spanje toe te reis,” sê Van der Hoven.
“Histories was dit ’n godsdienstige tog, maar hedendaags word dit gestap vir redes soos selfrefleksie, selfontdekking, vir die uitdaging, of om net weg te breek van modern, gejaagde roetines. Wat nog steeds geld, is dat ’n mens al die materiële besittings dra wat jy nodig mag hê vir die reis wat voorlê.”
Hy kon dus nie “nee” sê toe die Camino hom vanjaar weer teruggeroep het nie.
“Vanjaar het my roete begin in Irun, ’n Spaanse dorpie wat lepel lê in die Franse Suidkus. My bestemming was Santiago, amptelik 850 km ver. Ek het van Santiago verder Wes gestap na Finisterre en toe Noord na Muxia. Die totale afstand wat ek afgelê het, was, na-ure en ompaaie ingesluit, net meer as 1 200 km, met daaglikse afstande van tussen 25 en 35 km.”
Hy vertel die natuurskoon en die afwisselende tonele wat insluit pragtige strande, skilderagtige dorpies, en woude met ’n verskeidenheid van plantegroei is onbeskryflik.
