Die voormalige onderwyser Enrico de Bruin van Macassar het besluit om sy hart te volg en sê die skilderagtige roete na sy droom om ’n chirurg te word, was die moeite werd.
De Bruin se pad het van leerder na student na onderwyser en weer terug na student gelei. Hy studeer nou vir ’n baccalaureus-graad in geneeskunde en chirurgie aan die Universiteit Stellenbosch met die doel om ’n dokter te word.
“Dit was my droom vandat ek in graad ses was,” het De Bruin gedeel.
Hy het die moeilike besluit in 2015 geneem om natuurlike medisyne aan die Universiteit van Wes-Kaapland te studeer. “Dit was tussen natuurlike medisyne of chirurgie, hoewel my hart uitgeroep het na natuurlike middels, want ek stel nog altyd in plante belang,” meen die oud-onderwyser.
Ná vier jaar het hy sy graad ontvang, maar toe moes hy weer ’n moeilike keuse maak – hy was gereed om chirurgie te studeer, maar is deur die volwasse wêreld in die gesig gestaar. Die De Bruin-familie het in die C-blokke in Macassar gewoon, en al was hulle nie brandarm nie, het die oud-onderwyser gevoel dat hy die enigste een was wat die situasie kon verbeter.
“Ek het toe my nagraadse onderwyssertifikaat verkry en vir my was dit ’n praktiese besluit,” het De Bruin gesê.
Hy het eers by sy alma mater, Macassar Sekondêre Skool, en daarna by Valsbaai Primêre Skool, klasgegee. De Bruin glo hy was ’n goeie onderwyser omdat hy empatie met sy leerders kon hê, want hy het uit dieselfde gemeenskap gekom en woon steeds in Macassar.
“Ek het egter nog altyd gevoel asof ek ’n voël is wat in ’n hok vasgevang is,” het hy gesê.
De Bruin het in 2023 ’n dapper stap geneem om uit sy “hok” te breek en aansoek gedoen om chirurgie te studeer. Ongelukkig vir hom is hy nie aanvaar nie.
“Ek het in 2024 aansoek gedoen om oorsee onderwys te gee asook chirurgie te studeer, en is vir albei aanvaar,” het hy verduidelik.
“Ek het vyf jaar lank prakties gedink, maar dié keer my hart gevolg.”
Vir De Bruin is die ervaring om weer ’n student te wees, nou nog baie vars omdat hy eers Woensdag 5 Februarie met klasse begin het. Die feit dat sy klasmaats nou dieselfde ouderdom as sy eerste gr. 8-klas is, het nie by hom verbygegaan nie.
“Dis ’n aanpassing om te gaan van voor in die klas staan na in die banke te sit saam met medestudente – en jy is heelwat ouer as hulle. Dit hou ’n mens nederig,” het hy gesê en gelag.
De Bruin hoop sy storie sal ander mense sowel as ander onderwysers inspireer.
“Ek sê nie mense moenie onderwys studeer nie, maar as jy weet jou hart is nie daarin nie, neem die eerste stap,” het die chirurgie-student gesê.
“As jy lief is vir loodgieterswerk en jy moet kies of jy ’n prokureur of ’n loodgieter wil wees, doen wat jou gelukkig gaan maak.”
V As jy De Bruin wil ondersteun om sy drome waar te maak, kan jy ’n skenking in sy Back a Buddy-rekening gee: https://www.backabuddy.co.za/campaign/from-teacher-to-healerhelp-fund-mymedical-journey.
