Die gemeenskap van Sir Lowry’s Pass het die aankondiging deur die Wes-Kaapse onderwysdepartement (WKOD) – dat die eerste hoërskool vir die gemeenskap binnekort gebou sal word – verwelkom.
Volgens Kerry Mauchline, woordvoerder van Debbie Schäfer, die minister van onderwys, is die kontrak om die skool te bou, op 15 November verlede jaar toegeken.
“Die oorhandiging van die terrein en die aanvang van werklike bouwerk is op hande. Die skool sal na verwagting teen Januarie 2024 gereed wees en word tans beplan om 1 110 leerders te akkommodeer, wat met skoolplasing in die gebied sal help,” het sy bevestig.
Die perseel is op die oop stuk grond tussen Missionstraat en Sir Lowry’s Pass-weg geleë.
Stuart Pringle, ’n voormalige raadslid van wyk 84, het ook sy opgewondenheid oor die ontwikkeling uitgespreek.
“Inderdaad is ek opgewonde! Die kwessie van bykomende skole in die Helderberg was een wat ek en die destydse raadslid Benedicta van Minnen in ons ampstermyn in 2011 gedryf het en dit het gelei tot verskeie inisiatiewe, soos meer klaskamers en nuwe skole soos die hoërskool wat vir Sir Lowry’s Pass beplan word,” hy het gesê.
Die nuwe skool sal as reddingsboei dien vir honderde hoërskoolleerders wat oor die Helderberg versprei is en vroegoggend moet reis om betyds by die skool te kom.
“Ons het honderde studente van Sir Lowry’s Pass wat ons skool bywoon en moet dikwels aansoeke afwys namate ons kapasiteit bereik. Die nuwe skool sal baie voordelig vir almal in die gemeenskap wees,” het Joanne Adams, die hoof van Rusthof Sekondêre Skool, gesê.
DistriksPos het inwoners van die omliggende gemeenskap se kommentaar gevra. Een het sonder huiwering gesê die skool kom al so lank aan, maar ook nie.
Nog een was van mening dat die bou van ’n baken van hoop vir die gemeenskap wonderlik is, veral omdat kinders vroegoggend per bus na skole in ander Helderberg-gemeenskappe vervoer moet word.
’n Ander het nie geweet van die planne vir ’n nuwe skool nie, maar gesê sy is gelukkig oor die ontwikkeling waarby die hele gemeenskap en sy kinders sal kan baat.
