Die Helderberg betreur die verlies van ’n geliefde inwoner, gesinsman en legende in plaaslike rugbykringe.
Nigel Phillips is vanoggend (Donderdag 7 Julie) in die ouderdom van 49 oorlede.Die Strand-inwoner het sy stryd teen keelkanker verloor nadat hy verlede Desember met larynale kanker gediagnoseer is.
Huldeblyke het reeds op sosiale media begin instroom met St. George’s-rugbyklub wat hulde gebring het aan ’n “Lulu-legende” en verder hul medelye aan Phillips se familie meegedeel het. “[Dis] nog ’n hartseer dag vir ons as ’n rugbygemeenskap, -familie en -vriende, om te hoor van die afsterwe van ’n groot Lulu-legende, Nigel Phillips,” lui die inskrywing. “[Ons] innige meegevoel aan sy familie, geliefdes en almal wat hy opgehef het deur rugby en ons gemeenskap te voed. Rus in ewige vrede en styg in heerlikheid; jy sal gemis word deur baie Ta Nige.”
Phillips se dogter, Nicole, het meegedeel dat hul gesin met die groot verlies van hul patriarg onbeskryflike hartseer in die gesig staar. “My pa was ons alles. My alles, want ek kon op hom staatmaak,” het sy aangevoer. “Hy was ’n liefdevolle gesinsman wat altyd daar was. Sy onwrikbare ondersteuning en teenwoordigheid sal gemis word.”
Die bedroefde 30-jarige het haar pa verder as lewenslustig beskryf – iemand wat as gevolg van sy natuurlike positiwiteit jongelinge bemoedig en sonder twyfel ’n helpende hand aan sy medemens verleen het.
Phillips is op 22 Augustus 1972 in Somerset-Wes gebore en sy grootwordjare in Garden Village deurgebring. Hy het sy skoolloopbaan by Danie Ackermann Primêre Skool voortgesit en hoewel hy nie hoërskool gehaal het nie, het hy hom vir 13 jaar as pligsgetroue werknemer aan Domline, ’n plaaslike vervaardiger van badkamer-toebehore, gewy.
Phillips het in 2013 die geloofsprong geneem en sy eie konstruksiemaatskappy, NP Construction, op die been gebring. Nicole het sedert sy diagnose die leisels van die sakeonderneming oorgeneem.
Phillips was vir jare passievol by Living Legends betrokke en het as spanbestuurder vir die jeugontwikkelingsorganisasie se rugbyspanne wat ywerige deelnemers van die gewilde Hot Summer of Touch-raakrugbytoernooi is, gedien. “Ons het vanoggend wakker geword met die verskriklike nuus dat ’n legende ons verlaat het. Nigel Phillips is vandag na ’n harde stryd teen kanker oorlede,” lees ’n Facebook-inskrywing deur Hot Summer of Touch.
“Sy status as ’n gemeenskapsleier en pionier in Strand is legendaries! Nigel se liefde vir en toewyding aan die Maynardt Touchies, Living Legends en Forward Foundation het hom verpersoonlik as ’n organiseerder en leier sonder vergelyking. Sy vermoë om altyd die beste vir die sport en die jeug te soek, in teenstelling met ’n wen ten alle koste, is wat hom van ander onderskei het.
“Hy was ’n aktiewe staatmaker in die WSCBTA [Western and Southern Cape Beach Touch Association] en het altyd volgestaan ??by sy oortuigings en toewyding. Dit is ietwat onmoontlik om toekomstige vergaderings en Hot Summer of Touch-toernooie sonder sy teenwoordigheid te voor te stel. Nige, jy sal baie gemis word! Ons meegevoel, gedagtes en gebede gaan uit na sy familie en sy geliefde Strand-gemeenskap.”
Phillips word oorleef deur sy vrou Mary-Ann (50), dogter Nicole, seun Mikyle (26) en sesjarige kleinseun.
