Brendyn Alloys het sy kindertrauma in ‘n reddingsboei vir Strand se kwesbaarste seuns omgeskep en word vandag (Woensdag 27 Augustus) met die Ron Herring Mission of Service-toekenning vir 15 jaar se voorkomingswerk vereer.
“Hierdie toekenning is ‘n bewys dat gewone mense deur hul optrede en diens met diep meegevoel vir die mees kwesbare in die samelewing inderdaad die katalisator vir maatskaplike verandering in ons gemeenskappe kan wees,”
sê Alloys.
Die Ron Herring Mission of Service-toekenning word jaarliks sedert 1998 deur die ManKind Project toegeken en vereer mans wat hul persoonlike missies in uitstaande gemeenskapsdiens omskakel.
Die ManKind Project vier vanjaar sy 40ste bestaansjaar en is al langer as 20 jaar in Suid-Afrika aktief.
“Brendyn is die afgelope 10 jaar by die projek betrokke en help mans om hul doel te vind,” sê Nick Holleman, nasionale sentrumdirekteur vir die ManKind Project Suid-Afrika.
Holleman verduidelik dat die prys erkenning gee aan Alloys se werk in Strand, waar hy die afgelope 40 jaar woon – veral sy werk met die jeug.
“Ek is deur my grootouers grootgemaak en het sonder my pa grootgeword, soos die meeste kinders uit lae-inkomste-gemeenskappe in enkelouer-huishoudings,” sê Alloys.
Sy kinderjare sonder ‘n vaderfiguur het ‘n diepgaande uitwerking op sy emosionele ontwikkeling gehad. “Die gebrek aan ‘n positiewe manlike rolmodel kan jou lewe regtig ontwrig – veral as jy ‘n seun is,” verduidelik die 42-jarige. As tiener in die vroeë 2000’s het hy by Hearts of Men, ‘n organisasie wat programme vir mans en seuns gefasiliteer het, aangesluit.
“Dié program het tot my persoonlike transformasie gelei. Ek is blootgestel aan positiewe manlike rolmodelle en mans wat sosiale vaderfigure geword en my gementor het,” sê hy.
Hierdie ervaring het die grondslag van sy huidige filosofie gelê.
“Die passie vir gemeenskapswerk is diep gewortel in my liefde vir die mensdom. Liefde is die teengif vir alle menslike lyding en ongeregtigheid. Liefde genees alles,” sê Alloys. “Dit gaan daaroor om jou trauma en pyn as katalisator vir maatskaplike verandering te gebruik.”
Voordat hy ander kon help, moes hy eers self heel word. In 2012 het hy ‘n New Warrior Training Weekend voltooi, wat beduidend tot sy genesing bygedra het.
“Ek het nou die heilige voorreg om met jong mans te werk wat uit vaderlose huise kom om hul emosionele groei en welstand te ondersteun,”
Alloys lei tans die Kaapse Wynlande se Head, Heart and Soul Rites of Passage-program vir jong mans, met ‘n fokus op jeug van Strand.
Alloys ontvang Woensdag die toekenning by die ManKind Project se tuiskomseremonie by die Novalis Ubuntu-instituut in Wynberg.
You must be logged in to post a comment.