Die saak van seksuele aanranding teen ‘n bekende gemeenskapspolisiëringsforum-lid het die afgelope Donderdag (25 September) weer in die Strand-landdroshof voortgegaan, maar is uitgestel.
Die 56-jarige word deur verskeie aanklagte in die gesig gestaar – ontbloting van geslagsorgane aan ‘n minderjarige, twee aanklagte van gedwonge seksuele selfbevrediging, twee aanklagte van crimen injuria en ook seksuele aanranding.
Die voorvalle het na bewering op 6 Julie en 26 Julie plaasgevind.
Hy is op 6 Augustus aangekeer en uit sy GPF-rolle geskors (“Beskuldigde uit Gemeenskapspolisiëringsforum geskors weens aanklagte“, DistriksPos & Helderberg Gazette, 13 Augustus). In sy borgtogaansoek het hy beweer hy het die minderjarige as vrywilliger-berader gehelp nadat haar ma hom gekontak het.
Die staat het borgtog sterk teengestaan weens veiligheidsrisiko’s en sy klaarblyklike aansien, terwyl Vroue in Aksie ‘n petisie met 817 handtekeninge ingedien het.
Die beskuldigde is op 15 Augustus ten spyte hiervan R2 000 borgtog toegestaan (“Gemeenskapspolisiëringsforumlid kry borgtog van R2 000“, DistriksPos & Helderberg Gazette, 20 Augustus).
Die saak gaan op Maandag 6 Oktober in die Strand-landdroshof voort.
