Somer in die Kaap, asook die Helderberg-kom, is die perfekte tyd om die buitelewe te geniet. Die son skyn, en daar is tonne wandelpaadjies en staproetes om van te kies terwyl jy tyd saam met vriende en geliefdes deurbring.
“Dit is maklik om veilig te bly terwyl jy oefen en die buitelewe geniet,” sê Charnel Hattingh, Fidelity Service se groephoof van bemarking en kommunikasie. “Ons hoop dat jy deur hierdie stap-vir-stap gids te volg al jou aandag sal kan fokus op die genot van die natuurlike skoonheid van die Moederstad waar jy ook al is.
- Dra ’n ID: Dra ’n vorm van identifikasie saam met jou sodat enige omstanders sal weet wie jy is en wie om te kontak in geval van ’n noodgeval. Die meeste oefentoerusting het om hierdie rede klein sakke.
- Veiligheid in getalle: Hattingh ontmoedig dit ten sterkste om alleen te hardloop of fiets te ry. Sluit liewer aan by ’n groep mense wat kan uitkyk vir jou veiligheid en langs die pad aanmoediging bied wanneer spierpyn of krampe intree.
- Sê vir iemand: Nog ’n goeie idee is om te verseker dat iemand wat jy vertrou, weet dat jy op pad is vir draf of fietsry, en ’n idee het van die roete wat jy beplan om te neem en wanneer jy verwag om terug te keer. Sodoende kan hulle vinnig alarm maak as jy nie soos beplan terugkeer nie.
- Wees sigbaar: Dra weerkaatsende klere om seker te maak jy is sigbaar vir ander padgebruikers. Hardloop teen die verkeer en ry fiets saam met die verkeer. Dit maak jou selfs meer sigbaar vir ander. Probeer van sypaadjies of enige aangewese fietspaaie gebruik maak.
- Varieer jou roetine: As jy jou roete en oefentyd verander, maak dit dit moeilik vir enige voornemende misdadiger om jou bewegings te voorspel. Die verandering in natuurskoon kan ook die fisieke inspanning draagliker maak.
- Laai jou selfoonbattery: Maak seker jou selfoonbattery is ten volle gelaai sodat jy hulp kan ontbied in geval van nood. Dit is ook belangrik om die korrekte noodkontaknommers op jou foon te stoor sodat jy vinnig die polisie, jou sekuriteitsmaatskappy of jou buurtwag kan kontak wanneer jy dit nodig het.
- Mobiele opsporing: Vind uit by jou sekuriteitsmaatskappy of hulle ’n mobiele opsporingstoepassing bied wat op jou selfoon afgelaai kan word. Dit is ’n doeltreffende manier om nooddiensverskaffers te waarsku wanneer jy hulle nodig het, terwyl hulle ook jou akkurate ligging gee, veral as jy langs ’n bergpaadjie of in ’n woud hardloop of stap.
