Neels du Toit
Die Helderberg-rugbyklub se eerste span – baie dun weens talle beserings – het Saterdag (26 Julie) sy grootste pak slae (12-31) nog op sy tuisveld in sy wedstryd teen Brackenfell, 10de op die Superliga A- punteleer, gekry.
Ironies genoeg was Berge eerste op die telbord in die 10de minuut ná ‘n mooi drie van die belowende veelsydige agterspeler G-Jay Fortuin, wat sy 17de drie vir die seisoen gedruk het (5-0).
Hierna het die Brakkies oorgeneem en die telling met drie drieë voor rustyd na 5-17 omgeswaai.
In die 51ste minuut het Berge se heelagter, Jayden Daniels, van sy eie 22-meter-lyn af met ‘n kronkellopie dwarsdeur Brackenfell gehardloop en onder die pale oorgeduik. Michael Visser se doelskop het dit 12-17 gemaak en dit het gelyk asof lig in Berge se donker tonnel skyn. Brackenfell was egter nog nie klaar nie en het nog twee verdoelde drieë bygevoeg – eindtelling 12-31.
Buiten Fortuin en Daniels het die agtsteman, Duan Koen, en die flank Blaine Skeleton skitterspel opgelewer.
Met Berge se uitgedunde spelertal is Woensdagaand se ligabepaling in die Charles Morkel-stadion teen die gedugte Ikeys ‘n berg van ‘n vooruitsig.
Ander uitslae:
– SLA: St George’s 33-55 UWC;
– SLB: Macassar 17-8 KSUT;
– SLC: Strand United 3-10 Langa;
– Promosieliga: Blue Stars 17-10 Sir Lowrians; en Morning Star United 26-22 Raithby Universals.
Wedstryd vir Woensdag 30 Julie:
– SLA: Helderberg t. UCT (Charles Morkel).
Wedstryde vir Saterdag 2 Augustus:
– SLB: Macassar t. NTK (Riverside Park);
– SLC: Strand t. All Saints (Gustrouw), Busy Bees t. Strand United (Langa); en
– Promosieliga: Raithby Universals t. Blue Stars United (Raithby).
You must be logged in to post a comment.