‘n Honderdjarige Gordonsbaai-inwoner kook steeds haar eie kos en oefen gereeld.

Minnie Fourie het Saterdag (11 Julie) die merkwaardige mylpaal van ‘n eeu gevier by die plaaslike Spur in Kusweg. Die restaurant was gevul met familie, haar dogter Amanda Engelbrecht, kleinkinders en agterkleinkinders, wat bymekaargekom het om hierdie buitengewone vrou te vier.

“Ek het die Spur gekies omdat ek wou hê dit moet by die stilte en vrede van Gordonsbaai se see wees,” sê Fourie.

Op die dag het sy ‘n brief aan haar familie voorgelees om haar dankbaarheid teenoor hulle uit te spreek.

Fourie se aktiewe leefstyl is geen verrassing vir diegene wat haar ken nie. Sy kook haar eie kos, oefen gereeld en bly sosiaal. Sy bring haar dae deur met lees, Sudoku en legkaarte bou om haar brein aktief te hou.

“Dit gaan alles oor roetine en stiptelikheid wat mense van kleins af leer,” sê Fourie, ‘n inwoner van die Summervale-aftreeoord.

Hierdie beginsels is vroeg in haar lewe gevorm. Die honderdjarige is in Zeerust, Noordwes-Provinsie gebore, op ‘n plaas waar sy al haar skooljare die horlosie moes dophou om betyds in die klaskamer te wees. “Eers moes ek met ‘n donkiekar skool toe ry, en toe my broer ook die skool bygewoon het, het ons 11,3 km met fietse gery,” verduidelik Fourie. “Dit was nogal ver.”

Haar ouers het hierdie beginsels in hulle installeer, en Fourie pas dit tot vandag nog toe.

Sy het later met Jopie getrou en uit die huwelik is drie seuns en ‘n dogter, Amanda, gebore. Fourie was hoofsaaklik ‘n huisvrou, maar het ook administratiewe werk gedoen.

In 2006 het sy na Gordonsbaai verhuis, en vir die afgelope byna twee dekades het sy vrede aan die Valsbaai-kus gevind.

Oor die jare het Fourie baie gesien en geleer. Die grootste verandering wat sy aanskou het, is selfone. Dis vir haar die grootste uitdaging, maar sy is besig om dit te bemeester. “Sy kan WhatsApp en stuur vir my stemnotas, maar sy sukkel om die foon te laai,” verduidelik Amanda met ‘n glimlag.

Vir Fourie is die geheim vir ‘n lang lewe eenvoudig: “Ken God en wees dankbaar,” sê sy.

Maar om fiks te bly op 100, verduidelik sy, moet jy gesond eet en nie onnodig medikasie neem nie.

Met die begin van nog ‘n hoofstuk in haar lewe is een ding seker: Fourie is nie van plan om stil te sit nie.