Avontuurlustige bejaarde van die Strand skrik nie vir hoogtes nie

‘n 81-jarige ouma van die Strand het verlede maand haar lewenslange droom deur te valskermsweef.

“Alles is vir my ‘n avontuur,” sê Helene “Kleintjie” Krijnouw.

“Ek het in my lewe gevind dat dit nie net goeie dinge is wat ‘n avontuur is nie, maar slegte dinge kan ook ‘n avontuur wees.”

Die waaghalsige bejaarde was Donderdag 21 Augustus op vakansie in die Wildernis in die Tuinroete toe die geleentheid vir valskermsweef hom voorgedoen het.

“Elke keer wat ons in die Wildernis was, het ek altyd gesê ek wil dit doen, en dan sou almal vir my sê: ‘Jy is mal, dit is so gevaarlik,’” vertel Kleintjie.

Op die dag van die vlug was sy saam met haar man Hugo wat haar aangemoedig het deur vir die ervaring te betaal.

“Toe hulle my vas gordel was dit my enigste senuweeagtige oomblik, maar voordat ek twee keer kon dink, was ek vasgemaak,” verduidelik Kleintjie.

Saam met die vlieënier het die bejaarde toe die ervaring beleef. “Om daar bo te wees, sweef jy net,” sê die Strand-inwoner wat die land en see kon aanskou.

Terwyl hulle in die lug was, het die vlieënier verduidelik dat valskermsweef heeltemal van die wind afhang en as die wind gaan lê, sou hulle ‘n noodlanding moes maak.

“Ek het gesê: ‘Broer, as dit vandag met ons gebeur, dan kan jy met my enige plek land, net nie in die see nie. Ek kan nie swem nie. Ek is in die Boesmanland gebore,’” sê sy met ‘n glimlag.

Hierdie humor en moed kom nie uit die bloute nie. Kleintjie is in Brandvlei in die Noord-Kaap gebore waar sy as die jongste van drie dogters ‘n ware wildekind was wat verkies het om saam met die seuns te speel en boom te klim.

In 1960 het haar gesin na die Helderberg verhuis waar sy ‘n leerder aan die Hoërskool Hottentots-Holland in Somerset-Wes was. Die volgende jaar het sy haar man Hugo ontmoet.

Na jare as ma van drie kinders het sy in die laat jare tagtig ‘n suksesvolle gebreide klerebesigheid begin wat sy 25 jaar lank bedryf het tot sy en Hugo in 2013 afgetree het.

Dit is toe haar avontuurlustige gees weer na vore gekom het. Die volgende sewe jaar het die paartjie in ‘n woonwa gewoon nadat hulle hul huis in Kleinmond verkoop het. “Ons het getoer en elke aand ‘n vuur gemaak en gebraai,” sê Kleintjie.

Dit was eers in Junie verlede jaar dat die twee hul woonwasleutels opgegee het en na Van Niekerk-Benadehof in Strand verhuis het nadat hulle 14 jaar op die waglys was.

En dit is nie ‘n ouetehuis nie, en jy moet dit baie duidelik stel. Dit is ‘n aftreeoord,

Die paartjie het nie toegelaat dat hul nuwe lewensomstandighede hulle keer nie. Elke tweede Vrydag gedurende die somer organiseer hulle braaisessies by die aftreeoord, en wanneer die weer afkoel, skakel hulle oor na potjiekos.

Sy behou haar avontuurlustige gees omdat sy glo dit sal maklik wees om in depressie te verval gegewe die werklikheid van veroudering.

Mense moet nie dink dat net omdat hulle afgetree het, hulle moet stilsit nie. Doen iets konstruktiefs, dan kan jy nie negatief wees nie,

Hierdie lewensfilosofie het die ouma van twee die motivering gegee om voort te gaan om nuwe avonture te soek terwyl sy uitsien na haar 82ste verjaardag in November.

“My kleinkinders het my gevra: ‘Ouma, wat is volgende?’” vertel Kleintjie met ‘n glimlag.

Sy het Victoria-waterval op haar wenslys, maar wat sy regtig wil doen, is om weer te valskermsweef.

“Ek wil dit weer doen, want die laaste keer het ek net teruggelê. Volgende keer wil ek regop sit en kyk wat onder aangaan,” verduidelik Kleintjie.

Met Victoria-waterval op haar wenslys en planne om weer te valskermsweef, is een ding seker: hierdie 81-jarige se avonture het pas begin lewe.