Stellenbosch was die tuiste van ’n suksesvolle internasionale junior- tennistoernooi wat van Maandag 27 tot Vrydag 1 Desember op die Van der Stel-sportterrein gehou is.
Die J30 Wynlandweek 1 Junior Internasionale Tennisstigting (ITF)-toernooi het gesien hoe tennissterre van oor die wêreld heen op die Kaapse Wynland-fasiliteit se tennisbane toesak om die gesogte meisies- en seunstitels te bekom. Die toernooi is deur die Federico Coppini-stigting aangebied, met Le Roux Conradie van die Forward Foundation wat diens gedoen het as toernooidirekteur.
Op die ou einde het die Somerset-Wes-inwoner en derderangse junior Suid-Afrikaanse speler Hanmare McAslin haar debuut- ITF-meisiestitel opgeëis en ’n 6-4, 6-3 oorwinning oor Alicia Taylor. In die seunskompetisie het die ongekeurde Heinrich Rootman van Middelburg, Mpumalanga, die seunsafdelingtrofee opgelig nadat hy die eindstryd teen die sewende gekeurde Willem de Waal met 6-4 en 6-4 oortuigend gewen het.
Hanmare, ’n 17-jarige leerder van die Hoër Meisieskool Paarl, was vol lof vir die fasiliteit. “Dit was ’n baie goed georganiseerde toernooi en ek het ’n goeie week op die baan geniet,” het sy vertel. “Die fasiliteit is wonderlik opgeknap.”
Sy het geglo haar oorwinning en eerste ITF-titel was ’n positiewe stap om haar droom te verwesenlik. “Ek hoop om in die toekoms universiteitstennis in die VSA te speel, en ek dink om my eerste ITF-titel te wen is ’n stap in die regte rigting.”
Heinrich, ook 17, het sy ondersteuningspan en afrigters bedank vir hul toewyding aan sy loopbaan, veral om sy eerste titel te verower. “Dit was ’n ongelooflike ervaring en ’n wonderlike week,” het hy gesê en bygevoeg dat die werklikheid van wat in die eindstryd gebeur het, nie ingesink het nie.
Die tuisskoolleerder het gesê hy het geen spesifieke tennisdrome gehad nie en “volg die pad” wat vir hom uitgelê is. “Waar ek ook al gaan, of dit nou op die tennisbaan is of nie, ek wil net altyd my beste gee.”
Die wenduo het stof in die oë geskop van spelers van Suid-Afrika, Tsjeggië, Swede, Groot-Brittanje, Namibië, Italië, Oostenryk en die Demokratiese Republiek van die Kongo.
Om ’n toernooi van hierdie kaliber in Stellenbosch aan te bied, strook goed met die doelwitte van die Federico Coppini-stigting, stigter en naamgenoot van die gasheerstigting. Die Italiaanse onderdaan, wat nou die Eikestad sy tuiste noem, was beïndruk deur die standaard van tennis wat deur die week vertoon word.
“Ons benodig meer van hierdie soort toernooie in Stellenbosch en meer spelers van ander lande om ons kus te besoek, sodat ons plaaslike spelers hulself kan toets,” het Coppini gesê. “As daar meer van hierdie interaksies is, kan ons spelers dalk hul spelvlakke opstoot.”
Die J30 Wynlandweek 2 Junior Internasionale Tennisstigting (ITF)- toernooi is tans by dieselfde plek aan die gang, en is veronderstel om môre (Vrydag 8 Desember) af te sluit.
Die burgemeesterskomiteelid vir Jeug, Sport en Kultuur, JC Anthony, is beïndruk deur hoe die toernooi georganiseer is en het gesê Coppini het ’n “nuwe flair” vir die afrigting van tennis in Stellenbosch gebring.
“Ek ondersteun hierdie ontwikkelingsinisiatiewe opreg, aangesien dit aan jongmense van alle vlakke van die lewe geleenthede bied om te groei,” het hy gesê.
“As die munisipaliteit sal ons voortgaan om ons ondersteuning te verleen deur grond beskikbaar te stel, soos ons by Van der Stel- en Idasvallei-sportterrein gedoen het. Ons hoop om dit in die toekoms in Khayamandi, Cloetesville en die buiteliggende dorpe te doen. Ek wil vir Frederico bedank dat hy tennis na ons toe gebring het, en ons hoop sy werk sal na ander dorpe binne die munisipale gebied versprei.”
