Hoërskool Strand het ’n uitsonderlike atletiekseisoen gehad met atlete wat by verskeie byeenkomste presteer, medaljes verwerf of goeie plekke behaal het.
Vier-en-twintig Arende het in Maart aan die Boland-atletiekkampioenskap by die Dal Josafat-stadion in Paarl deelgeneem. Die beste atlete van elke streek het hier deelgeneem en kragte gemeet. Agt van die skool se atlete is vir die Boland-atletiekspan gekies.
Die Arende het as volg presteer: Dewald de Koker (silwermedalje, 400 m, seuns o.19); Adriaan Kennedy (brons, 400 m-hekkies, seuns o.19); Christopher Smit (vierde, hamergooi, seuns o.15); Caitlin Isaacs (silwer, 100 m, brons, 200 m, meisies o.17); Kristin Meyer (silwer, 10 000 m-stap, meisies o.19); Enya Scholtz (brons, hamergooi, meisies o.19); Anél Swart (vierde, hamergooi, meisies o.17) en Marli Botha (silwer, hamergooi, meisies o.17).
Vyf atlete het in die Maart-skoolvakansie aan die Suid-Afrikaanse atletiekkampioenskap in Port Elizabeth deelgeneem en drie medaljes huis toe gebring.
Marli en Kristin het elk ’n brons medalje vir onderskeidelik hamergooi en 10 000 m-stap gewen.
Dewald en sy drie spanmaats het silwer in die 4×400 m-aflos vir seuns o.19 gewen.
Sewe begeesterde Arende-atlete het van 28 tot 30 Maart aan die strawwe Atletiek Suid-Afrika jeug/junior kampioenskap in Paarl deelgeneem.
Anél het 13de in die hamergooi geëindig en Caitlin was agtste in die 100 m-eindronde.
Dewald en Adriaan was lid van die 4×400 m-aflosspan wat ’n bronsmedalje gewen het.
