Die duo Velvetblohm, met die begaafde musikante Jan Blohm en Ryno Velvet, het die afgelope paar maande opslae gemaak met hul unieke gesamentlike vertonings en eerste enkelsnit.
“Die karakters in ‘Kaap’ deel hul meegevoel en verlange oor die afstand tussen hulle, maar wens mekaar ook die beste toe,” deel die duo. “Ons wou die liedjie graag vanuit ’n storievertellersperspektief benader, en dit was die inspirasie daaragter – ’n ongekompliseerde storie van teleurstelling, maar ook vernuwing.”
Alhoewel die Strand-inwoner Blohm en Velvet reeds in 2006 en 2009 saam getoer het, het die idee vir ’n amptelike Velvetblohm-produksie eers aan die einde van verlede jaar posgevat toe hulle weer besluit het om saam op te tree. Wat begin het as ’n manier om hul grootste treffers op ’n besonderse manier met bewonderaars te deel, het hulle dit saam met Kobie Koen van Vonk Musiek ontwikkel tot ’n geleentheid om nuwe materiaal op te neem en vry te stel.
“Die Blohmhuis-teater bied intieme vertonings vir besoekers en kunstenaars, en om hierdie droom te kon bewaarheid, is werklik ’n seën. Ek sien baie uit om dié projek verder te laat ontwikkel,” sê hy.
