Die Helderberg-rugbyklub se vier spanne het Saterdag (13 Mei) op Jagtershof almal teen Kuilsrivier gewen, maar in die hoofwedstryd was dit maar ’n gesukkel.
Die Superliga A-wedstryd was soos ’n derby met sterk verdediging van albei spanne en vele ongedwonge foute, met ’n eindtelling van 14-19 in Berge se guns.
Helderberg het die eerste twintig minute van die stryd minstens drie geleenthede verspeel om punte aan te teken – blykbaar weens senuwees. Kuilsrivier het egter in die 26ste minuut ’n verspot maklike verdoelde drie gedruk (7-0). In die 29ste minuut het die Berge-slot Shane Kennedy die bal van die inskop raakgevat en tot op Kuile se 22 gevorder, waar sy kaptein en agsteman, Conway Pretorius, hom by hom aangesluit het.
Pretorius het sy senter, Quinn Visser, gevoer, wat onder die pale gaan druk het, waarna sy ouboet, die skrumskakel Michael Visser, maklik verdoel het (7-7). Hierna was Berge pal op die aanval – eers met ’n lang lopie van sy heelagter, Jeandre Lukas, maar die telling het tot rustyd onveranderd gebly (7-7).
Vyf minute ná die hervatting het Pretorius op loop gesit, Michael Visser gevoer, wat op sy beurt die senter Bokkie Carstens in besit gestel het, die verdedigers gepypkan en agter die pale gaan druk het.
Michael Visser het die ekstras bygevoeg (7-14).
In die 61ste minuut het Kennedy deur die Kuilsrivier-voorspelers vir sy drie in die hoekie geploeg (7-19), maar die sterk wind het die doelskop wyd gewaai.
Die tuisspan het in die 78ste minuut nog ’n verdoelde drie aangeteken, wat die eindtelling 14-19 gemaak het.
Die groot helde in hierdie hardverdiende oorwinning was Kennedy en Pretorius voorlangs en die senterpaar Carstens en Quinn Visser. Die spel van die haker, Jacques van Zyl, en die flanke Estehan Visagie en Schalk Burger, verdien ook vermelding.
Die klub geniet loslootjies vir Saterdag 20 en 27 Mei en speel eers weer Saterdag 3 Junie teen Hamlets.. St George’s RFC het na UCT vir hul Superliga A-botsing gereis, maar strawwe weerstand gekry en die knie 40-13 gebuig. Die eerste helfte was ’n gelykop-wedstryd. Die Lulu Boys het die telling in die 16de minuut met ’n strafdrie geopen. ’n Strafdoel deur Curtley Hendrikse in die 24ste minuut het die telling op 0-10 te staan gebring voordat ’n drie deur UCT dit 7-10 gemaak het. Hendrikse het in die 32ste minuut nog ’n strafskop behaal (7-13), wat met rustyd vinnig deur nog ’n UCT-drie (14–13) teëgewerk is. UCT het in die tweede helfte blink uitgekom, besit oorheers en vier drieë gedruk om hom van ’n oortuigende oorwinning en die Lulu Boys hul tweede nederlaag van die seisoen te besorg.
St. Georges pak Hamlets op 27 Mei.. In Superliga B het die All Saints RFC sy wenmomentum aan die gang gehou met ’n sege van 32-24 oor Bellville voor ’n volgepakte skare by die Helderzicht-sportterrein. Die ontmoeting met ’n hoë telling het die tuisspan vier drieë laat druk – een elk vir Duwayne Raubenheimer, Sipho Hobosch, Kyle Wessels en Jeraldo Jacobs. Marco Anderson het twee strafskoppe en drie doelskoppe oorgestuur.
Saterdag (20 Mei) reis All Saints om Vineyards RFC te ontmoet. Strand RC se wedstryd teen KSUT is uitgestel en hulle speel nou tuis teen Belhar.. In Superliga C beïndruk Macassar RFC steeds met ’n oorwinning van 31-26 oor Scottsdene. Saterdag reis die MC Boys om Busy Bees aan te durf.. Ander Uitslae: Northern League: Strand United 44-24 Delft; Windmeul 12-27 Raithby Universals, Sir Lowrians 38-12 Blakes; Gordon’s Bay Pioneers 20-24 Whistling Wheels RFC.
