Die uitstekende kwaliteit van plaaslik-geproduseerde olyfolie is weer eens bevestig by die Absa Top 10-toekennings wat op Woensdag 16 Oktober by die pragtige Grande Roche-wynlandgoed in Paarl gehou is.
’n Somerset-Wes-landgoed se olies is op die gesogte lys by die geleentheid ingesluit, wat die hoogtepunt op Suid-Afrika se olyfoliebedryf se kalender is. Elke jaar, na die SA Olive-toekennings, ondergaan die onderskeie wenners ’n verdere ronde van blinde proe, waarvan die 10 beste ekstra suiwer olyfolies gekies word vir die hoogs gesogte Absa Top 10-toekennings.
Die 2024 Absa Top 10-toekennings wenners is:
• Morgenster Estate: Morgenster Don Carlo Medium
• Tokara: Tokara Mission Delicate (Stellenbosch);
• Terre Paisible: Terre Paisible Ekstra Suiwer Olyfolie Delicate (Franschhoek);
• Mardouw Investments Za (Pty) Ltd: Mardouw XXV Medium
• De Rustica Estate: Estate Range Intense
• Oudewerfskloof Olive Farm: Coratina Medium
• Kleinbergskloof: Kleinbergskloof Family Reserve Medium
• Rio Largo Olive Estate: Rio Largo Premium (Wit Etiket) Medium
• “Ouma Se Huis” Boutique Olive Estate: Charisma 2 Delicate
• Lapithos Olive Growers: Lapithos Estate Mission Medium
Wendy Petersen, uitvoerende hoof van SA Olive, het gesê: “Die Absa Top 10-toekennings is die toppunt van toekenningplatforms in Suid-Afrika om die uitnemendheid van die Suid-Afrikaanse olyfbedryf te vertoon en om die wenkombinasie van produk, mense en vaardighede, onderbou deur gehalte, te vier.
“Elke jaar is ons bevoorreg om die merkwaardige prestasies van ons produsente te aanskou, wie se passie en toewyding die hoogste gehalte in ekstra suiwer olyfolies aan verbruikers bring. Ons wil graag al die wenners gelukwens met hul merkwaardige sukses en Absa weer eens bedank vir die vennootskap met die olyfbedryf en die moontlik maak van hierdie belangrike geleentheid.”
