Langeveld, wat reeds in 1988 as onderwyser begin het, glo dat sy passie vir opvoeding hom oor die jare gemotiveer het. “Dis eers toe ek leerders kon help dat ek my passie gevind het,” sê hy. Hy erken egter dat hy nie meer dieselfde energie as voorheen het nie en dat sy aftrede in die beste belang van sy leerders is. “Om aan te hou sou onregverdig wees teenoor hulle,” sê hy.
Michelle Jacobs, wat sedert 2003 deel van Zandvliet is, was ’n onmisbare deel van die skool se struktuur. Sy het die skool se geldsake noukeurig bestuur en saam met vier skoolhoofde gewerk. “Ek het soveel veranderinge by die skool gesien,” sê sy. Jacobs sê sy sal haar kollegas die meeste mis. “Toe ek deur moeilike tye gegaan het, was hulle altyd daar met grappies om my op te beur.”
Met trane in Jacobs se oë en ’n waaiende Langeveld, het die leerders van die Hoërskool Zandvliet die twee afgetredenes met ’n erewag gegroet. Die waarnemende skoolhoof, Lester Hendricks, het hul bydraes tot die skool uitgesonder. Beide Jacobs en Langeveld sien uit na hul aftrede: “Ek wil die klein dorpies van Suid-Afrika verken,” sê Langeveld, terwyl Jacobs beplan om haar dansklasse voort te sit en dalk ’n instrument te leer speel.
