Sport, samewerking en ‘n kragtige boodskap aan die jeug. Dit was aan die orde van die dag toe die Khayelitsha-subdistrik se gemeenskaps- polisiëringsforum (GPF) die afgelope Saterdag (13 Junie) sy Jeugsportdag aangebied het.

Die geleentheid was deel van die subdistrik se Jeugdag-program vir Jeugdag (16 Junie) en het onder die tema “Bemagtiging van die jeug: bou aan ons toekoms” by die Gustrouw-sportterrein in Strand plaasgevind.

Plaaslike jeugspanne het in sewesrugby, gelei deur Irven October van die St. George’s-rugbyklub, en netbal, gelei deur Lisa Visser van die Strand-gemeenskap, meegeding.

Die GPF se doel was om jongmense deur sport saam te bring, met die fokus op jeugontwikkeling, veiligheids- en omgewingsbewustheid, loopbaanvoorligting, opvoedkundige ondersteuning, en lewens- en kommunikasievaardighede.

GPF’s van Strand, Somerset-Wes, Gordonsbaai en Macassar was teenwoordig, saam met die subvoorsitter, Marlon Solomons, nuutverkose adjunkvoorsitter, Donovan Brown, en die nasionale GPF-voorsitter, Francina Lukas.

Wenspanne het trofeë, medaljes en sertifikate ontvang, terwyl elke span nuwe balle, geborg deur plaaslike sekuriteitsmaatskappye uit Gordonsbaai en Fidelity ADT, ontvang het.