Die vernuftige kuns judo ontmoet Suid-Afrikaanse veerkragtigheid wanneer die ervare judoka Madré van Dalen haar eie styl na die Helderberg bring en ‘n revolusionêre selfverdedigingsdojo begin, wat klassieke tachi-waza met moderne bemagtigingsopleiding kombineer.
Die dojo open Maandag 1 September sy deure vir nuwe studente by die Voortrekkersaal op die hoek van Lourensfordweg en Swallestraat in Somerset-Wes.
“Ek kombineer die tradisionelerespek en tegniek van judo met praktiese selfverdedigingsvaardighede wat in werklike situasies werk,”
verduidelik Van Dalen.
Die 41-jarige swartgordelhouer het haar provinsiale en nasionale kleure in judo verwerf en aan talle internasionale kompetisies deelgeneem.
Van Dalen het met judo begin toe sy agt jaar oud was nadat haar pa – ook ‘n judoka – haar aan die sport bekendgestel het. “Ná daardie eerste bekendstellingsklas kon niemand my keer nie,” onthou sy.
“Ek het ná 20 jaar in die gevegskunste geleer dat tegniek net die helfte van die geveg is – die ander helfte is om innerlike krag op te bou,” sê sy.
Haar unieke benadering, wat WKR-selfverdediging genoem word, is genoem ter ere van haar pa, Kenneth Rinquest, wat in 2012 oorlede is. Sy het LifeFit in 2020 gestig en ‘n dojo in Pretoria geopen voordat sy terug Kaap toe getrek het.
“Dit is waar ek my passie vir die veiligheid van vroue en kinders gevind het,” deel Van Dalen. “Almal verdien dit om veilig en selfversekerd te voel.”
Klasse sal Maandae en Donderdae aangebied word, met selfverdedigings-opleiding van 17:15 tot 18:00, gevolg deur judo-onderrig van 18:00 tot 19:00. Sy sal ook maandelikse kursusse vir volwassenes ouer as 18 aanbied.
Bel Van Dalen by 082 700 9688 vir nog inligting oor die klasse.
You must be logged in to post a comment.