Drie leerlinge aan die Hoërskool Jim Fouché (JF) het die afgelope skoolvakansie uitstekend presteer in Atletiek Suid-Afrika (ASA) se nasionale kampioenskap.
Dit het van 21 tot 23 Maart in die Pilditch-stadion in Pretoria plaasgevind.
Danny Melaat is as die Suid-Afrikaanse o.18-driesprongkampioen aangewys nadat hy met ’n afstand van 14,54 m gewen het.
Bertie Cruywagen, ’n matriekleerling, het ’n derde plek in die 200 m vir mans o.20 behaal, met ’n tyd van 20.79.
Danell Oelofse was algeheel derde in die 2 000 m-hindernisnommer vir vroue o.18, in 07:17.49.
Op die Suid-Afrikaanse skoleatletiekbyeenkoms, wat van 3 tot 6 April in die Paarl aangebied is, het Bertie as deel van die o.19-aflosspan ’n goue medalje verower.
Hy het ook twee silwermedaljes in die o.19-afdeling – in die 100 m en 200 m – verwerf.
Danell het brons in die 2 000 m-hinderniswedloop vir meisies o.17 verwerf.
Atlete wat vierde plekke behaal het, is Dayon Melaat (o.17) in verspring, en Ruan Kruger (seuns o.17) in hamergooi.
