Die rugbyvelde van die Oosrand gaan môre, op 28 Februarie, kook wanneer buurskole Die Anker en Oosterlig mekaar in ‘n vriendskaplike voorseisoen-wedstryd toets. Maar moenie dat die woord “vriendskaplik” jou mislei nie – wanneer die fluitjie vir die afksop blaas, sal dit ‘n ernstige besigheid wees.
“Dit is op papier ‘n vriendskaplike wedstryd,” sê Gavin Fourie, afrigter van Die Anker se 1ste XV.
“Maar wanneer die manne opdraf, is daar werk om gedoen te word. Ná 70 minute se spel sal ons mekaar weer as buurskole groet. Dit gesê, waardeer ons Oosterlig se goeie gesindheid.”
Albei spanne sal dié geleentheid as ‘n belangrike voorbereidingstoets vir die seisoen vorentoe gebruik. Vir Die Anker, wat vanjaar in die Virseker Noordvaal Bowl Afdeling meeding, een liga bo hul bure, is dit die ideale oefening voor die werklike geveg begin.
“Hierdie wedstryd bied vir ons ‘n waardevolle geleentheid om ons spanne verder te finaliseer met die oog op die komende PUK-reeks. Ons verwagting is dat die seuns hul voete sal vind in hul nuwe posisies en rolle, en hulself ten volle op die veld sal uitleef. Meer as enigiets anders hoop ons egter dat hulle die ervaring sal geniet,” het Fourie gesê.
Alhoewel Oosies minder bekend is vir rugby as hulle teenstanders, is hulle nie ‘n span wat onderskat moet word nie. Die skool het ernstige afseisoen-voorbereiding gedoen om spanne op ‘n goeie standaard te kry.
Die Valke het ‘n oefensessie by die skool behartig – ‘n waardevolle ervaring vir enige ontluikende rugbyspeler. Boonop het die ervare Monty Dumond ook die spanne kom help met hulle skopwerk, ‘n aspek van die spel wat dikwels die verskil tussen wen of verloor kan beteken.
Vir Oosterlig is dit ‘n gulde geleentheid om te bewys dat hulle saam met groter honde kan blaf. Met al die harde werk wat in die afseisoen ingesit is, kan hierdie die wedstryd wees waarin hulle ‘n indruk maak.
Eerste wedstryde van die seisoen het dikwels ‘n rou energie wat later in die jaar ontbreek: ‘n kombinasie van vars bene, honger harte en onbewese talente wat desperaat wil wys waartoe hulle in staat is. Beide spanne sal daardie energie môre op die veld bring.
Môre se skouspel sal waarskynlik nie die beste rugby van die jaar lewer nie. Verwag eerder ‘n tipiese voorseisoen-aangeleentheid met verskeie eksperimentele spelers wat posisies probeer, spelsisteme wat verfyn word, en kombinasies wat nog moet kliek. Maar dit is presies waarvoor hierdie wedstryde bedoel is.
Teen die einde van die wedstryd sal albei afrigters waardevolle antwoorde hê. Wie kan onder druk presteer? Het die skopwerk-oefensessies vrugte afgewerp? Waar lê die span se sterk- en swakpunte?
Vir ondersteuners is dit die eerste kans om hulle skole se rugbyvooruitsigte vir 2025 te peil. Vir die spelers self is dit die begin van ‘n reis wat hopelik met trofeë sal eindig.
LEES OOK: Meer as voorbereiding wanneer Ligbron en Rooibulle mekaar pak
