Broodtrok-moordenaar skuldig aan vier aanklagte van moord

KAAPSTAD – Twee Sasko-werknemers is in 2024 in  ʼn vlaag van gruwelike misdade op 16 Mei 2024 in Delft in  ʼn afleweringsvragmotor doodgeskiet.

Die saak het skokgolwe deur die land gestuur en beeldmateriaal van die insident waar die drie werkers op kort afstand in die wit Isuzu-vragmotor geskiet word, is  wyd op sosiale media gedeel.

Aanvanklike berigte dui daarop dat die aanval verband gehou het met afpersingstransaksies wat afleweringsvoertuie in die gebied op daardie tydstip geteiken het.

Ayanda Dayi (34), wat op die video van die bestuurskant af skiet, is vandag (Vrydag 20 Februarie) skuldig bevind op vier aanklagte van moord, een aanklag van poging tot moord, twee aanklagte van roof met verswarende omstandighede, ‘n aanklag van diefstal, drie aanklagte van die onwettige besit van vuurwapens en drie aanklagte van die onwettige besit van ammunisie.

Volgens Eric Ntabazalila, Wes-Kaapse woordvoerder vir die Nasionale Vervolgingsgesag  (NVG), word die hofsaak in die rondgaande hof in die Wynberg-streekhof aangehoor.

Die Staat het gepleit dat Dayi volgende week met vonnisoplegging tot vyf lewenslange vonnisse en vyf-en-sewentig jaar direkte gevangenisstraf gevonnis word.

Ntabazalila het gesê die skuldigbevinding volg op ‘n suksesvolle vervolging, noukeurig saamgestel deur senior-staatsadv. Esna Erasmus in samewerking met luit.-kol. Adrian Pretorius, die ondersoekbeampte. Selfs gesigsherkenningstegnologie is ingespan om die beskuldigde aan die misdade te koppel.

Volgens Ntabazalila het Dayi se misdaadvlaag die aand van 24 Januarie 2024 in Usasazastraat, Du Noon, begin toe hy en ‘n onbekende medepligtige vir Eric Yaphi en Elvis Thembelani Cwethiso in die Toyota Corolla wat Cwethiso bestuur het, doodgeskiet het. Daar is onder meer  ʼn 9mm Norinco-pistool gebuit.

Die polisie het vier patroondoppies op die toneel opgetel en op 31 Januarie 2024 het die polisie die Corolla geparkeer gekry in die Gushindoda-informele nedersetting by Delft.

Die voertuig was gesluit en die polisie het ‘n insleepdiens gaan soek. Met hul terugkeer, het hulle Dayi saam met nog  ʼn man in die voertuig gevind. Die deure, enjinkap en kattebak was oop, en ‘n vuurwapen was op die voorste passasiersitplek. Dayi het ontvlug deur sand in  ʼn polisieman, wat hom agterna gesit het, se gesig te gooi.

Ntabazalila het gesê forensiese ondersoeke het bevind dat een van die koeëls wat tydens die moorde op Yaphi en Cwethiso afgevuur is, uit die vuurwapen wat daardie dag uit die voertuig gekonfiskeer is, afgevuur is.  Die ander drie patrone het uit ‘n ander vuurwapen gekom. Dayi se vingerafdrukke is ook in die voertuig gevind.

Dayi is op 16 Junie 2024 in hegtenis geneem in die Delft-daghospitaal waar hy vir beserings wat hy glo opgedoen het nadat mense in die gemeenskap hom glo aangerand het.

Adv. Erasmus het in die loop van die hofsaak getuienis aangevoer dat Aphiwe Nogaya en sy twee kollegas, Xolani Gaji en Cebisile Mfundiso, op die oggend van 16 Mei 2024 brood by ‘n spaza-winkel op die hoek van Delft Main Road en Symphony Way afgelewer het.

Nogaya en een van die oorledenes het geld van die winkeleienaar ontvang en na die wit Isuzu-afleweringsvragmotor teruggekeer. Hulle het die geld aan die bestuurder oorhandig, wat dit begin tel het voordat hy dit in die kluis agter die voorste sitplekke sou sit.

Dayi het voor die voertuig verskyn en ‘n vuurwapen op hulle gerig. Hy het toe na die bestuurskant beweeg en die bestuurdersdeur oopgemaak.

Terselfdertyd het ‘n ander man, nou bekend as ene “Soso”, aan die passasierskant met ‘n vuurwapen verskyn. Hulle het die geld en ‘n selfoon gegryp. Hulle het ook na vuurwapens gesoek, waarna hulle skaamteloos op die drie insittendes in die vragmotor losgebrand het.

Die hof het gehoor dat sowat agt skote uit die twee vuurwapens afgevuur is. Gaji en Mfundisu is op die toneel dood. Nogaya het die aanval oorleef, maar moes weens verskeie wonde in die hospitaal opgeneem word en ‘n operasie ondergaan.

Die moontlikheid dat die aanvalle deel van  ʼn uitbuitingsindikaat (extortion) is, word nie uitgesluit nie.

Kringtelevisie-materiaal, wat deel van die bewysstukke gevorm het, is in die hof gespeel en as bewysstuk saam met ‘n stilfoto ingehandig.

Op 5 Junie 2024 het Nogaya die beskuldigde in ‘n fotoparade en in die hof uitgewys as die beskuldigde wat voor die vragmotor gestaan ​​het en toe na die bestuurskant gegaan het.

AO Nicolette Keyser, ‘n forensiese ontleder wat in gesigidentifikasie spesialiseer en by die Suid-Afrikaanse Polisiediens se Plaaslike Kriminele Rekordsentrum (LCRC) gestasioneer, het deur middel van morfologiese analise bevestig dat die beskuldigde die persoon is wat voor die broodvragmotor gestaan ​​het, soos uitgebeeld op die stilfoto’s en kringtelevisie-materiaal.

In argumente ter verswaring van vonnis het adv. Erasmus gesê Yaphi, Cwethiso, Gaji en Mfundiso het deur die beskuldigde se optrede doodsvonnisse ontvang. Sy het benadruk dat die families van elk van hierdie vier oorledenes, sowel as Nogaya, self veroordeel is tot ‘n ander soort lewenslange vonnis, een van permanente hartseer, onbeantwoorde vrae, trauma, nagmerries en onvervangbare verlies.

Dayi het vorige veroordelings van roof wat op 23 Augustus 2002 gepleeg is, waarvoor hy tot vier maande opgeskort vir vier jaar gevonnis is en ‘n verkragting wat op 16 Julie 2007 gepleeg is en waarvoor hy tot 18 jaar direkte gevangenisstraf gevonnis is. Hy is op 17 April 2018 op parool vrygelaat in plaas daarvan om sy vonnis tot 15 Julie 2025 te voltooi.

Dayi is ook gevonnis tot R1 200 of drie maande vir die onwettige besit van dwelms, wat gelyktydig met enige vonnis wat hy uitgedien het, uitgedien moet word.

Ntabazalila het verduidelik dat die feit dat hy weer oortree het terwyl hy voordeel getrek het uit voorwaardelike vrylating, toon ‘n blatante minagting vir die wet en vir die toegeeflikheid wat voorheen aan hom verleen is.

Die Staat het aangevoer dat Dayi ​​skuldig bevind staan aan ‘n reeks uiters ernstige oortredings wat die volgehoue ​​en berekende aard van sy kriminele gedrag uitwys.

Erasmus meen die beskuldigde het geen berou getoon nie en het ten spyte van oorweldigende bewyse teen hom, volhard in sy onskuld. Hy het volgens haar duidelik ‘n geneigdheid tot geweld en sy herhaalde gedrag in hierdie saak illustreer nie net brutaliteit nie, maar ook ‘n diepgewortelde bereidwilligheid om tot uiterste geweld oor te gaan.

Haar gevolgtrekking was dat Dayi  ʼn gevaar vir die samelewing inhou weens sy gebrek aan empatie en sy afwesigheid van berou. Sy voorsien nie dat hy gerehabiliteer sal kan word nie.

Erasmus het benadruk dat Dayi se misdade nie spontane gewelddadige dade nie, maar deeglik vooraf beplan is. “Die bewysstukke bewys oorlegpleging, nie impuls nie. Binne die bestek van slegs vyf maande het die beskuldigde vier afsonderlike moorde uitgevoer. Dit was nie ‘n geïsoleerde oordeelsfout nie. Dit was ‘n volgehoue ​​gedragspatroon gekenmerk deur berekening en opset. Elke keer het die beskuldigde gekies om die sneller te trek.”

Volgens die Staat is daar geen omstandighede teenwoordig wat die hof sou regverdig om van die voorgeskrewe minimum vonnisse af te wyk nie.

Dayi sal op Woensdag 24 Februarie gevonnis word.