’n Motoris wat vanoggend (Donderdag) vermoedelik met sy motor oor ’n plas water op die Paternosterpad gegly en teen ’n paal en ’n boom gebots het, is ongedeerd.
Dit volgens West Coast Medical Rescue wat een van die nooddienste was wat vinnig op die toneel was en die motoris gehelp het.
Geen beserings is op die toneel aangemeld nie.
Weather SA het vroeër ’n waarskuwing uitgereik vir swaar weerstoestande in veral die suid-westelike dele van die provinsie met tussen 40-60 mm en tot soveel as 80 mm reën wat in bergagtige areas opgevang kan word.
Daar is ook gewaarsku dat die hewige reënbuie daartoe kan lei dat paaie, laagliggende brûe, formele en informele nedersettings oorspoel. Dit kan ook tot gevolg hê dat noodsaaklike dienste soos elektrisiteit- en watertoevoer ontwrig word. Nog reën word vir Maandag voorspel.
Intussen moedig die Saldanhabaai-munisipaliteit mense aan om die weer en verkeersnuus dop te hou en hulle roetes daarvolgens te beplan om sodoende areas wat deur erge weer geraak is, te vermy.
Enige weerverwante voorvalle in die SBM-gebied kan gedurende kantoorure by die rampbestuurkantoor by 022 701 6835 of die noodbeheerkamer by 022 701 6834 (na-ure) aangemeld word.
