’n Bekende gesig het hom weer onlangs by die Weslander-span aangesluit, waar sy loopbaan in die vroeë jare negentig begin het – maar dié keer as uitgewer.
Stefan Kolver is met intrede van 1 April aangestel as die nuwe uitgewer van Weskus Media, wat Weslander en sy susterskoerant WeskusNuus in Atlantis insluit.
Kolver het in Desember 1993 by Weslander as junior advertensieverteenwoordiger begin om aan spesiale promosies en bylaes te werk. Die koerant was destyds nog in private besit met Gerrie en Suzelle Fourie as die eienaars.
Ses maande later, in Junie 1994, het hy alleen verantwoordelikheid geneem as die enigste advertensiekonsultant vir Weslander.
Naspers het Weslander in 1998 gekoop. Namate die Weskus ontwikkel en gegroei het, het die koerant gegroei en Kolver is tot advertensiebestuurder van Weslander, WeskusNuus en Swartland Gazette bevorder.
Hy het egter in 2012 besluit om sy vlerke te sprei – steeds binne die Media24-groep koerante – en na Somerset-Wes verhuis. In 2015 is hy Worcester toe om sy pos as uitgewer van Breedevallei Media vol te staan, met Paarl Media wat in 2017 by sy portefeulje gevoeg is.
’n Nuwe geleentheid het onlangs aan sy deur kom klop en Kolver sê hy is baie opgewonde om weer by Weskus Media, “waar als begin het”, betrokke te wees.
“Ek is baie opgewonde om weer by Weskus Media te wees. Vir my sal die Weskus en sy mense altyd ’n besonderse plek wees, met sy unieke karakter en spesiale mense, waarvan Weslander altyd deel was, en glo ek, sal wees. Ek sien uit om die Weskus saam met die Weslander-span ingelig te hou.”
Weslander vier vanjaar sy 52ste bestaansjaar, waarvan Kolver met trots 18 jaar kon deel wees, en sien uit om weer ’n positiewe bydrae te maak.
“Ons is tans besig met planne om Weslander meer toeganklik te maak vir sy lesers en sodoende ook beter waarde vir adverteerders te bied. Soos hulle sê – watch this space.”. Justin Cupido, wat sedert Augustus 2021 as uitgewer van Weskus Media gedien het, is nou uitgewer van Paarl Media en Hermanus Times in die Overberg. Die Weslander-span bedank hom vir sy bydrae en wens hom alle voorspoed op sy pad vorentoe.
