Om te weet of om nie te weet nie? Nie een van dié twee scenarios is maklik om te verwerk nie.
Talle families in die land sukkel met die gedagtes en vrae oor waar hul vermiste geliefdes is. Die kommer en angs hang swaar op dié wat deur hierdie situasie gaan. Maar wat doen jy as jy wel die antwoorde op jou vrae kry? Hoe hanteer jy dit en watter stappe neem jy volgende? Ons kyk na die nuwe verwikkeling van die vermiste Bradley Douw van Louwville.
Hoewel die familie antwoord gekry het en die soektog na hom nou tot ’n einde gekom het, is alles steeds nie verby nie.
Die feit dat sy lyk gevind en geidentifiseer is, beteken nie dat daar ten volle rus en afsluiting is nie. Soos die familie gesê het, is daar steeds talle vrae oor wat presies tot en met sy dood met hom gebeur het. Die kommer dat die persoon of persone steeds buite in die samelewing beweeg, is ’n moeilike pil om te sluk. Tog bly hulle hoopvol dat geregtigheid sal geskied.
Dit is elke familie se pleidooi om hul geliefde weer veilig by die huis te hê of om net vordering te sien. Soos ’n kenner destyds met Weslander gedeel het, word almal aangemoedig om nie op te hou soek nie. Hou die hoop lewendig en moenie ophou druk vir antwoorde nie.
