Ons sien dit oral om ons heen
waar mense lag en leef en ween
’n maskerwêreld wat verskuil
wat die hart oor jubel
en soms oor huil
gemaskerde gesigte
versteek die pyn van doodsberigte
van papier wat in die nanag kraak
met woorde wat weer heel wil maak
hierdie harlekyn
soek net na jóú, my lam
vir jóú wil sy haar masker
aan ’n kapstok hang
haar hunker hart is skaam
waar sy al die eensaam jare
agter ’n wegsteek-masker staan
niemand weet meer
hoe glinsterende oë
agter maskers lyk
want hierdie maskerwêreld
het aan openhartigheid beswyk
’n mengelmoes gesigte
wat gevoelloos in die verte staar
iewers iewers daar buite
hunker iemand êrens
om na die prente in jóú oë te staar
sy vra net een kans
om haar hart se skans te sak
vir jou wil sy haar wegkruip-masker
in vreesloosheid se tas wegpak
maar hierdie harlekyn
soek net na jou, my lam
vir jóú wil sy haar masker
aan ’n kapstok hang
haar hunkerhart is skaam
waar sy al die eensaam jare
agter ’n wegsteek-masker staan.
