Die Bergrivier-kanomarathon, wat gister (Woensdag 3 Julie) op die Bergrivier in die Paarl begin het, lyk na ’n stryd tussen jonk en oud.
Volgens Game Plan Media bly die stryd fel, ten spyte daarvan dat Hank McGregor (46), wat dié marathon al dertien keer vantevore gewen het, nie vanjaar deelneem nie.
Dié vierdaagse byeenkoms eindig Saterdag (6 Julie) by die Carinusbrug in Velddrif.
Die roeiers het gister 62 km na Zonquasdrift afgelê en moet vandag die 46 km na Bridgetown voltooi.
Vrydag volg die “Queen Stage”, ’n wrede 75-km-vaart na Zoutkloof, voordat hulle die laaste uitmergelende 57-km-skof na Velddrif aflê.
Van die gunstelinge om die podiumstryd te wen, is Jeremy Maher (22) van KwaZulu-Natal, verlede jaar se naaswenner, en Thomas Lovemore (26) van die Oos-Kaap. Verlede jaar het dié talentvolle roeiers onderskeidelik die eerste en derde skof van die moeilike byeenkoms gewen, maar die ervare McGregor het in die tweede skof van Zonquasdrift na Bridgetown sy eerste plek met ’n renwen-oorwinning verseker.
Die derde potensiële podium-aanspraakmaker is Thabani Msia (27), ook van KwaZulu-Natal. Msia het dalk nog nie die reputasie van sy mededingers met die Bergrivier-kanomarathon nie, maar het die Dusi-uithou-marathon al vyf keer agtereenvolgens gewen.
Die ouer brigade word gelei deur Robbie Herreveld. ’n Jong Herreveld het ses Bergrivier-kanomarathons in die 1990’s agtereenvolgens gewen. Ten spyte van die feit dat Herreveld ouer is, het hy as wenner en naaswenner uit die twee mees onlangse Bergrivier-kanomarathons geëindig.
Nog ’n kampioen wat geskiedenis maak, is Thulani Mbanjwa, die eerste swart roeier wat die Dusi-kanomarathon in 2008 gewen het. Na verwagting staan hy saam met ander ouer deelnemers soos Heinrich Schloms en Paul Marais ’n goeie kans om minstens ’n top-vyf-plek te behaal.
Die Ier David Horkan gee ’n internasionale geurtjie aan die geleentheid. Horkan, wat as avontuurkanovaarder bekend is, het ook ’n paar indrukwekkende ultra-marathon-uitslae soos die oorwinning in die gesogte Devises to Westminster. Horkan roei sonder die Bergrivier-kennis van sommige van sy plaaslike mededingers, maar as dinge reg val, kan hy ook ’n aanspraakmaker wees.
In die vrouewedvaart sal Stephanie von der Heyde selfversekerd wees ná ’n paar indrukwekkende uitslae in die opbouwedvaarte. Met Christy Shrimpton, die verdedigende kampioen, wat eksamen skryf, sal Von der Heyde waarskynlik 2023 se naaswenner Bianca Beavitt en die jong Tayla Isaac as haar grootste uitdagers sien.. Nog inligting is by berg.org.za beskikbaar.
