Die 2025/’26-tafeldruifseisoen is gekenmerk deur uitdagings, maar hoë volumes en goeie gehalte druiwe. Te midde van ‘n bedrywige oes het die Bergrivier-tafeldruif-produsentevereniging (BTPV) hul jaarlikse blokkompetisie op Saterdag 17 Januarie by Drie Seuns net buite Porterville gehou.
PG Marais en sy span van Dasdrif (Moorreesburg/Riebeek-Wes) is die wenner van die jongblokkompetisie en Topproduksiespan vir 2026, met ‘n tweede plek in die produksieblokkompetisie.
Morné Ellis en sy span van Vrede in Piketberg, was die wenner van die produksieblok, met ‘n tweede plek in die jongblok. Henry Horne van Vorentoe (Halfmanshof) het die derde plek in albei kompetisies behaal.
