Nasionale wetenskapweek het van Sondag 1 Augustus tot Saterdag 7 Augustus plaasgevind.
Pomario-skool in Citrusdal se graad 4- tot 12-leerders het volstoom hieraan deelgeneem. Wetenskapweek is gevier met verskeie aktiwiteite soos eksperimente met magnetisme en elektriese stroombane, en die dissekteer van skaapharte.
Die graad 7- tot 12’s het ook ’n besoek van dr. Ross Murray ontvang. Hy het ’n EKG-toets op ’n dapper matriekleerder uitgevoer, normale en abnormale hartsiklusse bespreek, ’n stetoskoop vir die skool geborg en vir die leerders geleer hoe om dit korrek te gebruik.
Op Vrydag 6 Augustus het die skool ’n kompetisie gehou waarin leerders kon aantrek soos ’n bekende wetenskaplike of uitvinder en vertel hoekom hul bydrae so merkwaardig was.
Grace Loubser het met die eerste prys weggestap nadat sy haar naamgenoot, Grace Hopper, se bydrae tot rekenaarwetenskap baie bekwaam uitgebeeld het.
Leerders is opnuut geïnspireer om leergierig en innoverend te wees.
