Die Saldanhabaai-munisipaliteit se afvalbestuurafdeling het vroeër vandeesmaand ’n suksesvolle afvalbewustheids- en opvoedingsveldtog in Middelpos aangebied, wat daarop gemik was om inwoners betrokke te kry en beter afvalbestuurspraktyke te bevorder.
Die gebeurtenis, op Dinsdag 11 Februarie is moontlik gemaak deur die ondersteuning van die plaaslike raadslid, Theresa Rossouw, wat ’n belangrike rol in die organisering van die dag gespeel het en die gemeenskap aangemoedig het om deel te neem.
Met die hulp van ’n toegewyde span veldwerkers – wat ook inwoners van Middelpos is – en toesig van munisipale wetstoepassers, was die veldtog ’n groot sukses, en het die voltooiing van 100 opnames tot gevolg gehad. Hierdie opnames het waardevolle insigte in die vullisbestuurstelsels en uitdagings wat die gemeenskap ervaar, verskaf.
Benewens die insameling van data is die geleentheid ook gereël om inwoners op te voed oor herwinning, behoorlike metodes vir die weggooi van vullis, die gevolge van swak vullisbestuur en die positiewe impak wat hulle kan hê deur ’n skoner omgewing te handhaaf.
Die data wat ingesamel is, sal nou deur die afvalbestuurafdeling hersien en ontleed word.
Die resultate sal ook met ander munisipale afdelings gedeel word om gebiede te identifiseer wat aandag vereis en om toekomstige verbeterings in vullisbestuur- en ander dienste te lei.
Sulke inisiatiewe om die gemeenskap betrokke te kry is noodsaaklik, nie net om bewustheid te verhoog en die publiek op te voed nie, maar ook om te verseker dat die munisipaliteit goed ingelig bly en in staat is om besluite te neem wat die werklike behoeftes van die gemeenskap aanpak.
Die afvalbestuurafdeling bedank almal opreg wat bygedra het tot die sukses van hierdie inisiatief, insluitend Rossouw, die veldwerkers, wetstoepassing en die betrokke inwoners van Middelpos.
