Die tydige aansoekvenster vir gr. R, 1 en 8 vir 2027 het op Dinsdag 14 April gesluit.
Altesaam het 166 144 leerders betyds aansoek gedoen vir plek in ‘n skool volgende jaar. Die Wes-Kaapse Onderwysdepartement (WKOD) is dankbaar teenoor hierdie ouers dat hulle die verantwoordelikheid geneem en betyds aansoek gedoen het om te help beplan vir plek in ‘n skool vir hul kinders.
Ouers wat nie teen die spertyd aansoek gedoen het nie, sal steeds laat aansoeke aanlyn kan indien tot Sondag 17 Mei. Laat aansoeke sal slegs deur skole oorweeg word nadat die aansoeke wat gedurende die tydige venster ontvang is, oorweeg is. Skole sal nou hul toelatingsbeleide toepas op al die aansoeke wat hulle gedurende die tydige venster ontvang het.
Die uitkomste van hierdie aansoeke sal van Donderdag 28 Mei aanlyn beskikbaar wees, en ouers moet hul keuse van skool teen Maandag 15 Junie bevestig.
Ouers wat verskeie aanbiedings van aanvaarding ontvang, maar nie een van daardie aanbiedinge teen 15 Junie kies nie, sal outomaties bevestig word as hul top-gekeurde keuse.
Ouers wat hul kind volgende jaar na ‘n ander skool vir gr. 2-7 of 9-12 wil oorskakel weens verskuiwing, sal die geleentheid hê om ‘n oordragversoek in te dien tussen 3 en 17 Augustus.
David Maynier, Wes-Kaapse Minister van Onderwys, het gesê die departement sal ouers nader aan die tyd aan relevante datums herinner.
“Ons doen ‘n beroep op alle ouers wat aansoek gedoen het om ons te laat weet as hul kontakbesonderhede verander, sodat ons die korrekte besonderhede het wanneer die uitkomste van aansoeke beskikbaar gestel word. Dankie aan al die ouers, skoolbestuurspanne en amptenare wat so hard gewerk het om te verseker dat die tydige toelatingsvenster glad verloop het.”
