Hank McGregor het Saterdag sy 12de titel in die Bergrivier-kanomarathon verower, maar vir talle plaaslike roeiers was daar ook baie om te vier.
Die plaaslike roeier Taxi Kotze en Hennie Lategan, lid van die Weskus-kanoklub, het Saterdag elk hul tiende marathon voltooi. Rene Boehm, ook van die klub, het sy 38ste marathon voltooi.
Die podiumposisies vir die dag het egter aan McGregor, Uli Hart (tweede) en Simon van Gysen (derde plek) behoort, met Jenna Nisbet (20:44:04), Nikki Birkett en Melanie van Niekerk wat die drie beste vroue-roeiers was.
McGregor het die laaste skof met ’n voorsprong van 90 sekondes begin en die roeiers uiteindelik na die eindpunt op die oewer van die Bergrivier in Velddrif gelei.
“As kind het ek groot gedroom om eendag die Berg’ te wen. Om my eerste titel te wen, was spesiaal. Ek is meer as gelukkig om my 12de een te kon wen,” het McGregor na afloop van die marathon gesê.
Sy algehele wentyd oor die 250 km was 18:41:05.
Nisbet het op haar beurt die vroueafdeling oorheers en haar eerste titel gewen. Danksy Nisbet se oorwinning het sy op haar beurt ook geskiedenis gemaak deur die algehele 16de plek in te neem – die hoogste nog vir ’n vroue-roeier.
Birkett het dit egter nie maklik gemaak nie en het op haar beurt die tog in 21:06:04 voltooi. Birkett en haar man, Andy, het verlede jaar geskiedenis gemaak toe hulle die eerste paartjie was wat die topposisies in die mans- en vroueafdeling gewen het.
Die winterweer het ook sy tol onder roeiers geëis. Sesmalige kampioen Robbie Herreveld moes hom in die laaste skof weens hipotermie onttrek. Dié voormalige Bergrivier-kampioen woon deesdae in Port Owen.
