Goudveld-Hoërskool se rugby-, netbal- en hokkiespanne het die naweek van 16 Mei kragte gemeet teen Bethlehem Voortrekker op Goudveld-Hoërskool se velde in Welkom.
Die eerste rugbyspan het vroeg momentum gekry toe Kamma Moloke met ‘n strafskop die telling op 3 – 0 geplaas het.
Voortrekker het teruggeveg en die leiding geneem met 3 – 5.
Moloke se tweede strafskop het Goudveld weer voor geplaas (6 – 5), voor Voortrekker weer druk
uitgeoefen het. Nog ‘n strafskop van Moloke het die rustydtelling op 15 – 9 vasgestel.
In die tweede helfte het Voortrekker se rolmaalbeweging momentum opgebou.
Die eindtelling was 40 – 19 in Voortrekker se guns.
Ander rugby-uitslae:
o.14A: 10 – 59
o.15A: 0 – 50
o.16A: 12 – 40
o.16B: 5 – 17
Die netbalspanne het op Saterdag 16 Mei hulle wedstryde gespeel.
Drie van die 13 spanne het hul wedstryde gewen.
Die o.16A- en o.19A-spanne het met een doel onderskeidelik verloor ná intense en spannende wedstryde.
Naledi Tadi, die eerstespan se verdediger, het uitgestaan.
Sy het deurentyd uitstekende druk op die opposisie geplaas en talle balle omgedraai met haar skerp spelontleding, vinnige reaksie en vasberade verdediging.
Die hokkiewedstryde van o.14 tot o.19 was taai en is in ‘n goeie gees gespeel.
Dit het goeie sportmanskap en respek tussen die twee skole getoon.
Die eerste span se seunswedstryd was opwindend, met beide spanne wat om beheer gebaklei het.
Voortrekker het vroeg die voortou geneem en daarin geslaag om vas te hou ondanks laat druk van Goudveld-Hoërskool.
Voortrekker het met 1 – 0 gewen. Zandré Warden van Voortrekker was die speler van die wedstryd.
Die eerste span se meisieswedstryd het goed begin.
Voortrekker het die voortou geneem in die eerste chukka met ‘n goeie doel en Goudveld-Hoërskool het gelyk gemaak om dit 1 – 1 in die tweede te maak.
Bethlehem het in die tweede
helfte ‘n goeie “comeback” gemaak en beheer oor die wedstryd geneem.
Hulle het vroeg in die derde chukka ‘n doel aangeteken en druk op Goudveld-Hoërskool geplaas.
Nog drie doele het gevolg vir ‘n 5 – 1 oorwinning.
Kelly Visagie van Bethlehem Voortrekker was die speler van die wedstryd.
