Noodhulp, tuinmaak, veldkook, spoorsny, dierekennis, groepspele, paraatheid en seremonies – hierdie is van die vaardighede wat Voortrekkers in Maart geleer het.
Sowat 100 laerskool Voortrekkers en volwassenes vanuit die Gqeberha, Kariega, Despatch en Kareedouw areas het op 16 Maart by Van Stadenskloof se Voortrekkerkampterrein saamgetrek om dié nuwe vaardighede te leer.
Mark Marshall van Sandula Conservation het vir die graad 4 Voortrekkers meer geleer oor slange in die gebied en die identifisering en hantering daarvan, terwyl ’n spesialis fasiliteerder die graad 6 groep geleer het van die bou van skuilings en die korrekte optrede tydens noodsituasies soos bomontploffings.
Die jonger klomp het geleer wat om te doen om ’n maatjie te help wat seergekry het, en die graad 1’s het kennis ingewin om hulle eie groente en blomtuin by die huis te begin.
Die graad 2 maats het die stokbrood, boerewors en aartappels wat hulle self gaargemaak het, geniet nadat hulle geleer het oor die gevare van vure, die korrekte blus daarvan en self hulle eie vure aanmekaar geslaan het.
Die graad 3’s het ook alles van spoorsny geleer en was bederf met ’n kuier van Jock, ’n spoorsnyhond wat deel vorm van die Teen Renosterstroop Eenheid.
- Om meer te leer van die Voortrekkers, kontak Adri Steyn by 083 293 4800.
