ETHAN Bothma (11) is aangewys om Suid-Afrika in 2020 by die 10de JSKA Wêreldkampioenskap in Lübeck, Duitsland te gaan verteenwoordig.
Hy is ook aangewys as “Karateka van die Jaar” by L&J Karate Academy op Uitenhage en het ook die Kata-wisseltrofee gewen.
Ethan het op 5-jarige ouderdom begin met karate en twee jaar later aan die JSKA Karate Wêreldkam-pioenskap in Swakopmund, Namibië deelgeneem. Daar is hy gekroon as wêreldkampioen nadat hy sy divisie vir die oranje tot groen-gordels gewen het. Ethan het drie medaljes by dié wêreldkampioenskap gewen waar karateka’s uit 14 internasionale lande deelgeneem het.
Op 9-jarige ouderdom het Ethan aan die JSKA Karate Wêreldkam- pioenskap in St Petersburg, Rusland deelgeneem. Karateka’s uit 19 internasionale lande het aan die wêreldkampioenskap deelgeneem. Ethan het teen 15 mededingers uit dié lande deelgeneem. Hy het ‘n algehele 3de plek behaal met kumite en daarvoor met ‘n brons medalje teruggekeer na Suid-Afrika.
Ethan het ook vroeër vanjaar in September aan die 24ste JSKA Internasionale Karate Ontwikkelings-kampioenskap deelgeneem en twee goue medaljes gewen.
Die kampioenskap is in Pretoria gehou en Ethan het goud gewen in die kata-afdeling sowel as goud in die kumite-afdeling.
’n Hoogtepunt was toe hy vir ‘n tweede jaar agtereenvolgend aan die einde van die kampioenskap ’n toe-kenning ontvang het as “JSKA South Africa Top Achiever Award 2019”. Dié toekenning is aan hom oorhandig uit ‘n groep van ongeveer 800 inskrywings. Karateka’s van Suid-Afrika, Japan, Brasilië, Mosambiek en Zimbabwe het aan die kampioenskap deelgeneem.
Ethan is die seun van Stephen en Mornette Bothma en is tans ’n graad 5 leerder van Laerskool Handhaaf.
