Leigh-Anne Bowley, ’n passievolle skrywer en entrepreneur van Goodwood, het in minder as twee jaar daarin geslaag om haar naam internasionaal bekend te maak.
Haar reis van ’n plaaslike skrywer tot ’n gerespekteerde internasionale stem is ’n verhaal van harde werk, slim beplanning, en ’n diepgewortelde liefde vir haar gesin en passie vir kreatiwiteit.
“Hoe word ’n mens binne twee jaar internasionaal bekend?” vra Bowley as sy die vraag herhaal. “Jy glo in jouself, jy bou ’n netwerk en jy werk onophoudelik daaraan om jou doelwitte te bereik.”
Bowley se suksesverhaal het begin toe sy artikels vir plaaslike tydskrifte begin skryf het.
Haar talent het vinnig aandag getrek, en voor sy haar oë kon uitvee, het sy begin werk aan projekte vir internasionale kliënte, insluitend ’n dokter in Dubai.
“Ek glo daaraan om grense oor te steek, of dit nou geografies of geestelik is,” sê sy. Haar skryfwerk het haar ’n stem gemaak vir vroue wat hul drome wil nastreef, ongeag waar hulle begin.
Ma, vrou en skrywer
Bowley is egter nie net ’n skrywer nie; sy is ook ’n toegewyde ma en vrou. “My kinders kom altyd eerste,” sê sy met oortuiging. “Dit maak nie saak wat nie.” Die geheim van haar sukses lê in haar beplanningsvaardighede. “Ek gebruik ’n dagboek vir alles – van gesinsaktiwiteite tot skryfroosters. Dit help my om ’n balans te handhaaf tussen die rolle wat ek vervul.”
Haar dagboeke is nie net ’n hulpmiddel nie; hulle is ’n inspirasie. “Ek wil mense wys dat jy alles kan doen wat jy wil, solank jy georganiseerd en doelgerig bly,” verduidelik sy.
Die idee van dagboeke
Die idee om dagboeke aan te bied, het ontstaan uit Bowley se eie liefde vir orde en kreatiwiteit. “Ek hou daarvan om nuwe dinge te skep en mense te help om hul eie lewe te organiseer,” sê sy. Vandag verkoop sy unieke dagboeke met persoonlike foto-voorblaaie, sowel as besigheidsdagboeke en selfs geskenke soos koppies en T-hemde met logo’s. “Mense hou van iets wat persoonlik en funksioneel is,” voeg sy by.
Om ’n dagboek of T-hemp te koop, bel Bowley by 066 206 4208.
