Kapenaars is bevoorreg om op Dinsdag 6 November hier op hul voorstoep vir die eerste keer na van sy nuwe, oorspronklike liedere te luister met sy optrede in ’n liefdadigheidskonsert in Die Boer-teaterrestaurant in Durbanville. Die optrede word gehou ten bate van die Yarden Children’s Enrichment Centre in Durbanville.
Loock, wat in die Strand bly, was deel van die groep Romanz, wat enorme sukses behaal het – in Suid-Afrika, asook internasionaal. Sedert 2013 betree Loock verhoë en teaters landwyd. Hy het onlangs ook optredes in Australië begin doen. Met sy konsert by Die Boer wil hy van sy nuwe, oorspronklike liedere bekendstel, en sal dit die eerste keer wees dat hy dit in die openbaar uitvoer.
Hy sing al van jongs af. “Ek dink as jy goed doen in sangkompetisies op skool, dan hou ’n mens aan. Ek het ’n groot liefde vir die verhoog en alles wat daarmee saamgaan.
“Selfs my ouers, wat hul passie vir musiek aan my bekendgestel het, het ’n invloed gehad. Liedjieskrywers, vervaardigers en medekunstenaars help almal vorm aan ’n sangloopbaan,” sê hy.
Met ’n pa, Hennie Loock, wat ’n leeftyd by die Tygerberg-kinderkoor betrokke was, is dit dan ook net te wagte dat hy met sy sangtalent ook in dié koor gesing het. “Dit verg baie opofferings van beide ouers en kinders – gereelde tye weg van mekaar, maar in dieselfde asem kan ek sê dat ek die hele Europa saam met my ouers kon sien en beleef. As dit nie vir die Tygerberg-kinderkoor was nie, sou ek nie die land saam met my pa en ma kon sien nie,” sê hy.
“Ek sal dit mis om elke nuwe liedjie wat opgeneem is vir haar te gaan speel, maar ek weet ons sal eendag weer saam musiek maak.”
