Atlete van Durbies en Gene Louw blink uit by Wes-Kaap-kampioenskap

Atlete van laerskole in Durbanville het die afgelope Saterdag hul slag by die Wes-Kaapse Laerskole-atletiekkampioenskap gewys en talle is gekies om op Saterdag 21 Maart aan die Nasionale Laerskole-atletiekkampioenskap in die DHL-stadion in Kaapstad deel te neem.

Van net twee laerskole, die laerskole Durbanville en Gene Louw, het ‘n allemintige 36 atlete vanjaar aan die Wes-Kaapse Laerskole-atletiekkampioenskap in die Coetzenburg-stadion in Stellenbosch deelgeneem en hul Wes-Kaap-kleure verwerf.

‘n Rekordgetal atlete van beide skole het gekwalifiseer om aan die Nasionale Laerskole-atletiekkampioenskap deel te neem. Onder die Durbanville-atlete het twee vir twee items gekwalifiseer, Silke Aucamp en Martus Schoeman.

Rekordgetal

Die Durbies het gespog met 19 atlete wat aan altesame 29 items by die Wes-Kaap-atletiekkampioenskap deelgeneem het. ‘n Rekordgetal van tien van hierdie atlete was onder die top-drie in hul onderskeie items en het vir die Nasionale Laerskole-Atletiekkampioenskap gekwalifiseer.

Die 10 atlete is: Greyling van den Heever (3de in seuns o.10 70 m hekkies); Martus Schoeman (2de in seuns o.13 80 m hekkies, 3de in 200 m hekkies); Christoff Groenewald-Mostert (1ste in seuns o.12 diskusgooi); JJ Bester (3de in seuns o.12 diskusgooi); Tiaan Janse van Rensburg (1ste in seuns o.13 hoogspring); Silke Aucamp (1ste in meisies o.13 800 m; 3de in 200m; beste baanatleet van die dag); Anika Brand (3de in meisies o.12 diskusgooi); Hanja Heesakkers (1ste in meisies o.12 spiesgooi); Josua Muller (2de in seuns o.13 spiesgooi) en Kari van den Heever (3de in meisies o.12 150 m hekkies).

Ander goeie prestasies was deur die meisiesatlete Lienka de Jager (o.13 1 200 m), Leah Louw (o.10 hoogspring) en Zoë van Zyl (o.11 hekkies), wat almal ‘n vierde plek in hul onderskeie items behaal het.

Kwalifiseer vir nasionale kampioenskap

Altesame 17 atlete van die Laerskool Gene Louw het hierdie afgelope Saterdag aan die Wes-Kaap Laerskole-atletiekkampioenskap deelgeneem, waarvan ‘n rekordgetal van agt atlete gekwalifiseer het om aan die Nasionale Laerskole-atletiekkampioenskap deel te neem.

Hulle is (uitslae in hakies) Ewan Gouws (1ste in seuns o.10 70 gewigstoot); Milea Jacobs (1ste in meisies o.11 hoogspring, 2de in 70 m hekkies, 3de in verspring); Jonathan Woodward (3de in seuns o.11 70 m hekkies); Ruben le Roux (1ste in seuns o.11 70 m hekkies, 2de in hoogspring); Saskia Mastenbroek (2de in meisies o.12 150 m hekkies); Rafael Josling (3de in seuns o.13 diskusgooi); Carla Barnard (1ste in meisies o.13 hoogspring, met ’n rekord); en Leo-Connor Krige (2de in seuns o.13 diskusgooi).

Ander atlete wat mooi presteer het, was Anke van der Merwe (meisies o.11 verspring) en Christiaan Stander (seuns o.13 80 m en 200 m hekkies), wat vierde in hul items geëindig het.