Beamptes van die Paarl-polisie en die blitspatrollie het Maandag (28 Augustus) inligting van die Transnet-ondersoekspan ontvang oor ’n voertuig wat moontlik gesteelde Transnet-eiendom vervoer.
Die voertuig is opgespoor en agtervolg nadat dit by ’n ongeregistreerde gebruiktegoederehandelaar in Paarl-Oos gesien is.
Die voertuig is voorgekeer toe die bestuurder op die N1 wou indraai.
Twee verdagtes is in hegtenis geneem weens die besit van vermeende Transnet-eiendom, wat substasiekabels, ander trein-onderdele, oorhoofse kabels en ander eiendom insluit.
Die geraamde waarde van die gesteelde eiendom moet nog bepaal word.
Die verdagtes moet nog in die Paarl-landdroshof verskyn.
