Paarl Krieketklub moes Saterdag tweede viool speel in Vredenburg toe Vredenburg-Saldanha-krieketklub hulle met 80 lopies geklop het in die Boland Premierliga-kompetisie.
Die tuisspan het verkies om eerste te kolf en het 218/7 opgestapel, terwyl die besoekers met slegs 138 kon antwoord.
Die veteraan Shane Summers (60, 2×4, 4×6) was die tuisspan se uitblinker en het die Paarliete gekarnuffel tydens hul 56 balle voor die penne.
Hy is goed bygestaan deur Nathan Engelbrecht (43, 2×4) en Neil Lochner (45, 3×4), terwyl Thomas Kannemeyer (21 nie uit nie) ook goed kom kolf het. Die aanvangsbouler Tylon Matthee (10-3-31-3) het die meeste skade aangerig vir Paarl, terwyl Waylain September (10-0-33-1) en Aqeeb Douman (2-0-8-1) se boulwerk ook die oog gevang het.
Paarl se top-kolwers kon nie die mas opkom nie en die twee wat uitgehardloop is, het hul sake bemoeilik. Dit was Waylain September (45 in 50 balle, 5×4) wat ’n kapteinsbeurt moes kom speel om sy span van vernedering te red. Akeem Minnaar (25, 3×4, 1×6) was die enigste ander kolwer wat weerstand kon bied teen Riaan Smit (10-1-33-2), Quinton Kannemeyer (5-0-13-2) en Lochner (7-0-18-1).
Die Paarlspan het Saterdag ’n loslootjie, met die jaarlikse derby tussen New Orleans SSS en Klein Nederburg SSS wat op die Parysveld gespeel word.
