Liggiesfees besonders, maar karnaval gemis

Elke jaar wanneer die feestyd aanbreek, sien ek en my gesin daarna uit om na die Paarl se liggiesfees te gaan.

Die atmosfeer is lekker, die verskillende kosse wat verkoop word is sappig en daar is ’n verskeidenheid stalletjies waar ’n mens amper enigiets kan koop – van speelgoed, vrugte en parfuum tot nagereg.

En dan moet ’n mens ook nie vergeet van die kunstenaars wat optree en die vermaak wat verskaf word nie. Dit is altyd ’n gesellige fees ná ’n lang jaar se harde werk agter die rug.

Ons was egter hierdie jaar ’n bietjie teleurgesteld dat daar nie soos vorige jare ’n karnaval was nie. Dis gewoonlik waarna die kinders ook die meeste uitsien. Ek meen daar is niks vooraf genoem dat daar nie ’n karnaval gaan wees nie.

Trotse Paarliet,

Seraj Johaar, Drakenstein-munisipaliteit se uitvoerende direkteur van korporatiewe en beplanningsdienste, het hierop geantwoord: “Ongelukkig moes ’n derdeparty-diensverskaffer die mallemeule kanselleer weens onvoorsiene omstandighede en kwaadwillige skade aan die diensverskaffer se toerusting by ’n aparte geleentheid twee weke vroeër. Die meeste van die vervangingsonderdele kom uit Italië en China en daarom kon die toerusting nie betyds herstel word nie. Gedurende hierdie tyd van die jaar is hierdie diens in groot aanvraag en alternatiewe reëlings kon nie in daardie laat stadium getref word nie.”