In ’n ware drieëfees met altesaam 18 drieë, het die Griekwas die afgelope Sondag (3 Augustus) met 48–39 geseëvier teen die Sanlam Boland Kavaliërs in Kimberley in hul tweede ronde van die Curriebeker-reeks.
Hoewel Boland se Donavan Don uitgeblink het met ’n driekuns van drieë, was dit uiteindelik nie genoeg om die tuisspan te stuit nie. Griekwa het agt keer gaan druk, teenoor Boland se ses, ná ’n uiters aanvallende wedstryd.
Dylan Thabo Maart, die Griekwas se vleuel en boorling van Wellington, het eerste vir sy span gaan druk.
Maar Boland se Lunathi Nxele het gou teruggeslaan met ’n skitterende deurbreekdrie reg onder die pale, verdoel deur James Tedder.
Die wedstryd is kort daarna onderbreek toe Boland se Gift Dlamini ’n ernstige beenbesering opgedoen het en per draagbaar van die veld geneem is. Hy vervang is deur Thurlow Marsh.
Griekwas het die voortou geneem en gaan druk deur ’n suksesvolle rolmaal-beweging, gevolg deur ’n strafdoel deur Tedder.
Oud-Bolander Gershwin Wher het ook bygedra tot die tuisspan se momentum met ’n verdoelde drie.
Boland het egter vasgebyt, en David Brits het ná goeie voorbereiding van Marsh ’n drie gaan druk. Donavan Don het met sy eerste drie Boland kort daarna laat voorloop.
Marcqiewn Titus het die belangrike bonuspunt-drie vir Boland gedruk, verdoel deur Tedder. Net voor rustyd het Don ’n briljante onderskepdrie onder die pale gaan druk vir sy tweede drie, weer verdoel deur Tedder, wat Boland ’n 34–19 voorsprong met halftyd besorg het.
Griekwas het egter onwrikbaar teruggeveg ná rustyd.
Hulle het twee keer gaan druk om die telling gelyk te laat trek en uiteindelik die voortou geneem danksy Wher se tweede drie van die wedstryd (36–34).
Don het sy driekuns voltooi in die 58ste minuut, wat Boland weer laat voorloop het met 39–36.
Die span van Kimberley het egter weer beheer geneem en twee verdere drieë gedruk in die laaste 12-minute van die wedstryd, waarvan een verdoel is, om die eindtelling op 48–39 te laat.
Griekwas het hul klas gewys in ’n kragmeting teen die Kavaliers en met deeglike spel in die laaste kwart van die wedstryd ’n oorwinning beklink.
Die Kavaliers, wat reeds in hul vorige wedstryd teen die Cheetahs probleme in die skrums gehad het, kon weer nie voorlangs hul man staan nie. Hierdie swakpunt het ’n groot rol in hul nederlaag gespeel.
Tog het die Bolanders ’n bonuspunt huis toe geneem – ’n klein beloning vir hul vasberadenheid en bydrae tot ’n opwindende wedstryd.
Die Boland Kavaliers speel gasheer vir die Fidelity ADT Lions Sondag 10 Augustus op Boland-stadion in Wellington. Afskop is om 15:00.
Boland se punte:
Drieë: Lunathi Nxele, David Brits, Donavan Don (3), Marcqiewn Titus.
Doelskoppe: James Tedder (3).
Strafdoel: James Tedder
