Die nasionale departement van water en sanitasie (DWS) het op 26 en 27 Julie ’n openbare konsultasiewerksessie met die watergebruikers van die Berg-Olifants-waterbestuursgebied gehou.

Dié Berg-Olifants-waterbestuursgebied sluit munisipaliteite soos Kaapstad, Stellenbosch, Drakenstein, Saldanhabaai, Matzikama, Cederberg en Bergrivier in.

Elke jaar stel die departement nuwe waterverbruikstariewe aan verbruikers voor, met die voorgestelde tariewe vir 2024-’25 wat van April 2024 sal geld.

Volgens die departement se Thembisa Torch sal die voorgestelde verhoging spesifieke sektore teiken, soos mynbou, nywerheid en energie, landbou en bosbou.

Die binnelandse mynbou- en nywerheidsektore het ’n voorgestelde verhoging van 6,26 c/m³, terwyl die landbousektor en alle gevestigde besproeiingsboere ’n voorgestelde verhoging van 3,01 c/m³ in die gesig staar.

Die departement het ook verbruikers ingelig oor die herinstelling van die afvalstortingsheffingstelsel vir nywerhede, myne en munisipaliteite.

Kommentaar van verbruikers binne die Berg-Olifants-waterbestuursgebied kan teen 16 Augustus aan die DWS gestuur word, wat op vergaderings op 16 en 24 Augustus bespreek sal word.